میڈاف کے فراڈ سے سرمایہ کاوروں کو پچاس ارب ڈالر کانقصان ہوا ہے

اقتصادی ماہرین اب اس خدشے کا اظہار کر رہے ہیں کہ ایسے مالی سکینڈلز میں نہ صرف انفرادی سرمایہ کاروں کے ڈوبنے کا خطرہ ہے بلکہ بڑے بڑے بینک بھی اس کا شکار ہو سکتے ہیں۔

اس سلسلے کا تازہ ترین مالی فریب اس وقت سامنے آیا جب نیو یارک کے ارب پتی سرمایہ کار برنارڈ میڈوف کا ہیج فنڈ بیٹھ گیا۔ اس ہیج فنڈ کی ناکامی کو امریکہ کی تجارتی منڈی وال سٹریٹ کی تاریخ کے بدترین مالی سکینڈلز میں سے ایک بتایا جا رہا ہے۔ اور اس کی ناکامی کے بعد رفتہ رفتہ ان بینکوں کے نام سامنے
آ رہے ہیں جنہوں نے بڑے پیمانے پر اس فنڈ میں سرمایہ کاری کی تھی۔

استغاثہ کا الزام  انہوں نے اپنی حراست سے پہلے اپنے چند قریبی ساتھیوں کو بتایا تھا کہ ان کا فنڈ ایک جھوٹ کے سوا کچھ بھی نہیں، وہ ختم ہو چکے ہیں اور خود کو حکام کے حوالے کرنا چاہتے ہیں لیکن اس سے پہلے وہ اپنے بچے کھچے بیس تیس کروڑ ڈالر اپنے مخصوص کارندوں، دوستوں اور رشتہ داروں میں بانٹنا چاہتے ہیں

دنیا کےکئی بڑے بنکوں نے کہا ہے کہ پچاس ارب ڈالر کے ایک فراڈ میں ان کی بھی رقم ماری گئی ہے۔ ان میں برطانیہ کا رائل بینک آف سکاٹ لینڈ، سپین کا سینٹینڈیر اور فرانس کا بی این پی پاریبا بھی شامل ہے۔

برنارڈ میڈوف کو پچھلے جمعے اس الزام میں حراست میں لیا گیا تھا کہ ان کے ہیج فنڈ میں بے ضابطگیوں سے عالمی سرمایہ کاروں کے پچاس ارب ڈالر ڈوب گئے ہیں۔

اس سکینڈل کا عالمی بینکاری پر کیا اثر ہو گا اس کا اندازہ اس بات سے لگایا جا سکتا ہے کہ سپین کے سب سے بڑے بینک سینٹینڈر نے برنارڈ میڈوف کے کاروبار میں تین ارب ڈالر سے زیادہ کی سرمایہ کاری کی تھی۔

اس کے علاوہ ہانگ کانگ شنگھائی بینک نے ایک ارب ڈالر، فرانس کے بی این پی پاریبا نے چھیالیس کروڑ ڈالر اور رائل بینک آف سکاٹ لینڈ نے اس فنڈ میں چالیس کروڑ ڈالر کی سرمایہ کاری کی تھی۔

کس کو کتنا نقصان ہوا مجموعی نقصان پچاس ارب ڈالر سینٹینڈیر تین ارب ڈالر برطانوی بینک آر بی ایس 600 ملین ڈالر فرانس کا بی این پی باریبا 460 ملین ڈالر فرانس کا نیٹ ایکسس 605 ملین ڈالر سپین کا بی بی وی اے 400 ملین ڈالر سرمایہ کار گروپ مان 360 ملین ڈالر جاپانی بینک نومورا 300 ملین ڈالر

برنارڈ میڈوف کے خلاف الزامات میں کہا گیا ہے کہ انہوں نے اپنی حراست سے پہلے اپنے چند قریبی ساتھیوں کو بتایا تھا کہ ان کا فنڈ ایک جھوٹ کے سوا کچھ بھی نہیں، وہ ختم ہو چکے ہیں اور خود کو حکام کے حوالے کرنا چاہتے ہیں لیکن اس سے پہلے وہ اپنے بچے کھچے بیس تیس کروڑ ڈالر اپنے مخصوص کارندوں، دوستوں اور رشتہ داروں میں بانٹنا چاہتے ہیں۔

ان الزامات میں کہا گیا ہے کہ برنارڈ میڈوف نے خود اعتراف کیا ہے کہ وہ اس فنڈ کو ایک ایسی سکیم کے تحت چلا رہے تھے جس میں نئے سرمایہ کاروں کا پیسہ پرانے سرمایہ کاروں کو منافع کے طور پر بانٹ دیا جاتا ہے اور یوں فنڈ کی حقیقی کمائی ایک جھوٹ کے سوا کچھ نہیں ہوتی۔

برنارڈ کے وکلاء کا کہنا ہے کہ انہیں پوری امید ہے کے وہ ان افسوسناک حالات سے جلد ہی نکل آئیں گے۔ لیکن اگر ان کے ستر سالہ مؤکل پر لگائے گئے الزام درست ثابت ہوئے تو انہیں بیس برس قید اور چاس لاکھ ڈالر جرمانہ ہو سکتا ہے۔

برنارڈ میڈوف کو سزا دینے سے کہیں زیادہ اہم یہ جانچنا ہو گا کہ امریکہ کہ بڑے بڑے اور پرانے سرمایہ کار اتنے وسیع پیمانے پر فریب کر کیسے لیتے ہیں۔ کیا انہیں کوئی پوچھنے بلانے والا نہیں اقتصادی ماہرین

تاہم اقتصادی ماہرین کا کہنا ہے کہ برنارڈ میڈوف کو سزا دینے سے کہیں زیادہ اہم یہ جانچنا ہو گا کہ امریکہ کہ بڑے بڑے اور پرانے سرمایہ کار اتنے وسیع پیمانے پر فریب کر کیسے لیتے ہیں۔ کیا انہیں کوئی پوچھنے بلانے والا نہیں؟

میڈوف کے ہیج فنڈ کا ایک بڑا سرمایہ کار ادارہ برامڈیئن آلٹرنیٹوز کے نام سے جانا جاتا ہے۔ اس ادارے کا کہنا ہے کہ یہ ایک حیران کن امر ہے کہ اس طرح کے فریب سالہا سال سے چل رہے ہوتے ہیں لیکن ان کے پیچھے کار فرما عوامل پر نظر نہیں رکھی جاتی۔

اس ادارے کی سربراہ نکولا ہارلک کا کہنا ہے کہ لوگوں کو مختلف بینکوں کے رویے پر سخت تشویش ہے۔ وہ سمجھتے ہیں کے بینکوں نے اپنی بساط سے بڑھ کر سرمایہ کاری کی اور غلط لوگوں کو قرضے جاری کیے۔ اور یہ کیس بھی اسی رویے کی ایک مثال ہے۔ سوال یہ ہے کہ جب یہ بینک میڈوف کو قرضے جاری کر رہے تھے تو کنٹرولز کہاں تھے۔ ایسا کیونکر ممکن تھا کہ ایچ ایس بی سی اور سینٹینڈر جیسے بڑے بینک ان کی مالی صحت چھانے بغیر انہیں قرضے جاری کر رہے تھے۔

نکولا ہارلک کو اپنے سوالوں کا جواب ملتا ہے یا نہیں یہ کہنا تو قبل از وقت ہو گا لیکن اتنا ضرور کہا جا سکتا ہے کہ عالمی اقتصادی بحران ابھی مغربی ممالک میں بسنے والے ارب پتیوں کے ایسے کئی کھیل بے نقاب کرے گا جو ترقی پذیر ممالک کے باسیوں کی پہنچ تو کیا شاید سمجھ سے بھی باہر ہوں۔