لیہمین برادرز کے دیوالیہ ہونے میں کافی وقت لگ سکتا ہے جس سے مختلف بینک اور مالیاتی ادارے غیر یقینی صورت حال سے دوچار رہیں گے

امریکہ کی تاریخ میں انیس سو تیس کے بعد آنےوالے اس بدترین مالی بحران کی وجہ سے ایشیا بھر کی تمام بڑی بڑی مارکیٹوں میں ٹریڈنگ کا آغاز ہوتے ہی قیمیتیں تیزی سے نیچے جانا شروع ہو گئیں۔

امریکہ:مالی بحران، بڑی کمپنیاں مشکل میں

ٹوکیو میں صبح کی ٹریڈنگ کے بعد حصص میں چار اعشاریہ آٹھ فیصد کی کمی ہوئی۔ جنوبی کوریا میں بھی مین انڈکس میں پانچ فیصد کی کمی ہوئی جبکہ ہانگ کانگ میں شیئر کی قیمتیں چھ فیصد گریں۔ آسٹریلیا اور نیوزی لینڈ میں بھی یہی رجحان رہا۔

شنگھائی، تائی پے اور سنگاپور میں بھی یہی صورت حال دیکھنے میں آئی اور حصص کی قیمتیں تیزی سے گریں۔

نیویارک کے حصص بازار وال سٹریٹ میں سوموار کو گزشتہ چھ برس میں شدید ترین مندی دیکھنے میں آئی۔ امریکہ میں یہ مالیاتی بحران ملک کے چوتھے بڑے بینک لیہمن برادرز کی طرف سے دیوالیہ ہونے کی درخواست دینے کے بعد شروع ہوا تھا۔

	ہانگ کانگ میں ایک سٹاک بروکر ایچ ایس بی سی بینک کے حصص پر نظر رکھے ہوئے ہے

دریں اثناء امریکن انٹرنیشل گروپ (اے آئی جی) کے بیٹھ جانے کے خدشات پیدا ہو گئے ہیں۔ اے آئی جی کبھی دنیا کے سب سے بڑے انشورنش گروپ کے طور پر جانا جاتا تھا۔ یہ گروپ بھی پیسہ اکھٹا کرنے کی کوششیں کر رہا ہے۔ اس دوران یہ اطلاعات بھی ہیں کہ اے آئی جی امریکہ کے فیڈرل ریزروز سے قرض حاصل کرنے کی کوشش میں ہے۔

مختلف ملکوں کے مرکزی بینکوں نے مارکیٹوں میں اعتماد بحال کرنے کے لیے اقدامات کرنے شروع کر دیئے ہیں۔ امریکہ کے فیڈرل ریزورز (اتھارٹی) نے ہنگامی بنیادوں پر دیئے جانے والے قرضوں میں توسیع کر دی ہے جبکہ برطانیہ اور یورپ کے مرکزی بینکوں نے انتالیس ارب ڈالر کی مالیاتی نظام میں سرمایہ کاری کی ہے۔

اقتصادی ماہرین کا کہنا ہے کہ امریکہ کے چوتھے بڑے بینک کا دیوالیہ ہونے کی درخواست دینا اور پچاس ارب ڈالر میں ایک اور بڑی بروکریج فرم میری لنچ کی فروخت نے امریکہ کے مالیاتی منظر کو یکسر تبدیل کر دیا ہے۔

دریں اثناء امریکہ کے صدر جارج بش نے اس بحران پر اپنا رد عمل ظاہر کرتے ہوئے کہا ہے کہ حکومت اس کے اثرات کو کم سے کم کرنے کے لیے اقدامات کر رہی ہے۔

ماہرین کے خیال میں اس طرح کے اداروں کا بیٹھ جانا امریکہ میں مارٹگیج مارکیٹ میں آنے والے مالیاتی بحران کا حصہ ہے۔ تاہم انہوں نے کہا کہ مسئلہ یہ ہے کہ کسی کو معلوم نہیں کہ اس طرح کے کتنے اور بینک اور مالیاتی ادارے اس کی لپیٹ میں آئیں گے۔

امریکہ کے وزیر خزانہ یا ٹریژری سیکریٹری ہینری پالسن نے ایک پریس کانفرنس میں کہا کہ وہ اس بات کو مناسب نہیں سمجھتے کہ لوگوں کے ٹیکسوں کا پیسہ لیہمن برادرز کو بچانے کے لیے استعمال کیا جائے۔ حال ہی میں حکومت نے ایک اور بینک بیر سٹرنز کو بچانے کے لیے ٹیکسوں کا پیسہ استعمال کیا تھا۔

پالسن نے کہا کہ موجودہ عالمی مالیاتی بحران آخر کار بہتری لائےگا۔ وائٹ ہاؤس میں ہونے والی اس پریس بریفنگ میں جو امریکہ کی مالیاتی تاریخ میں اپنی نوعیت کے بدترین دن کے اختتام پر ہوئی وزیر خزانہ نے کہا دنیا کے حصص بازاروں میں اس بحران کے اتنے شدید اثرات دیکھنے میں نہیں آئے جس کی توقع کی جا رہی تھی۔

امریکہ کے آئندہ صدارتی انتخابات کی دوڑ میں شامل دونوں امیدواروں جان مکین اور باراک اوباما نے اس بحران پر تبصرہ کیا ہے۔

باراک اوباما نے اس پر اظہار خیال کرتے ہوئے کہا کہ اس صورت حال سے اندازہ ہوتا ہے کہ گزشتہ آٹھ سال سے جو لوگ حکومت میں ہیں انہوں نے ان مسائل کی طرف مناسب توجہ نہیں دی۔

حکمران رپبلیکن پارٹی کے صدارتی امیدوار جان مکین نے اس عزم کا اظہار کیا کہ وہ ایک مرتبہ پھر عالمی مالیاتی منڈی میں امریکہ کی بالادستی بحال کریں گے۔

لہیمن بردار کے دیوالیہ ہونے کی درخواست کے بعد اس کے دفاتر سے ملازمین گتے کے ڈبو میں اپنی ذاتی اشیاء لے کر جاتے ہوئے نظر آئے۔

ماہرین کے خیال میں اس طرح کے اداروں کا بیٹھ جانا امریکہ میں مارٹگیج مارکیٹ میں آنے والے مالیاتی بحران کا حصہ ہے۔ تاہم انہوں نے کہا کہ مسئلہ یہ ہے کہ کسی کو معلوم نہیں کہ اس طرح کے کتنے اور بینک اور مالیاتی ادارے اس کی لپیٹ میں آئیں گے۔