امریکی صدر نے یقین دہانی کرائی ہے کہ اس واقعہ میں ملوث فوجی کے خلاف مقدمہ چلایا جائے گا

عراقی وزیر اعظم نوری مالکی کے دفتر سے جاری کردہ بیان میں یہ بھی کہا گیا ہے کہ امریکی صدر نے یقین دہانی کرائی ہے کہ اس واقعہ میں ملوث فوجی کے خلاف مقدمہ چلایا جائے گا۔

تاہم وہائٹ ہاؤس نے صدر کی معافی کے حوالے سے کوئی بیان نہیں دیا ہے۔

بیان میں کہا گیا ہے کہ امریکی صدر نے عراقی وزیر اعظم سے فون پر ذاتی طور پر معافی مانگی۔ ’امریکی صدر نے امریکہ کی طرف سے معافی مانگی ۔۔۔ یقین دہانی کرائی کہ اس فوجی کے خلاف مقدمہ چلایا جائے گا۔’

بیان میں کہا گیا ہے کہ اس واقعہ کے بارے میں عراقی عوام اور حکومت میں غم و غصہ کے حوالے سے نوری مالکی نے صدر بش کو بتایا۔

واضح رہے کہ امریکی فوجی کو اس وقت واپس امریکہ بھیج دییا گیا تھا جب عراقی پولیس کو شوٹنگ رینج سے گولیوں سے چھلنی قران ملا تھا۔

پچھلے ہفتے امریکی فوج نے کہا تھا کہ اس واقعہ میں مبینہ طور پر ملوث فوجی کو یونٹ سے نکال دیا ہے، واپس امریکہ بھیج دیا ہے اور اس کے خلاف کارروائی کی جائے گی۔ اس فوجی کا نام ظاہر نہیں کیا گیا ہے تاہم وہ سنائپر یونٹ میں سٹاف سارجنٹ تھا۔

امریکی فوج نے پہلے ہی مغربی بغداد کے علاقے کے رہنماؤں سے معافی مانگ لی ہے اور ان کو قران کی نئی کاپی بھی پیش کی ہے۔