بغداد کے علاقے صدر سٹی میں کافی تباہی ہوئی ہے

پولیس کے مطابق حکومتی افواج اور مقتدیٰ الصدر کی مہدی ملیشیا کے درمیان اس لڑائی میں گزشتہ تین دنوں میں ایک سو سترہ افراد ہلاک ہوئے ہیں۔

تشدد کے تازہ واقعات جمعرات سے بغداد میں غیرمعینہ مدت کے لیے نافذ ہونے والے کرفیو کے باوجود ہو رہے ہیں۔ لڑائی کا مرکز شیعہ علاقے ہیں، بالخصوص بغداد کا صدر سٹی جسے مہدی ملیشیا کا گڑھ سمجھا جاتا ہے۔

مقتدیٰ الصدر کے اس اعلان کے بعد کہ وہ عراقی وزیراعظم کی جانب سے دیے گئے الٹی میٹم کے باوجود ہتھیار نہیں ڈالیں گے، بغداد میں نافد کرفیو میں غیرمعینہ عرصے کی توسیع کر دی گئی ہے۔

ادھر عراق کے جنوبی شہر بصرہ کے بیشتر علاقوں پر مہدی ملیشیا کا کنٹرول برقرار ہے اور وہاں ہونے والی لڑائی میں امریکی اور برطانوی افواج بھی حصہ لے رہے ہیں۔

بتایا گیا ہے کہ برطانوی افواج نے بصرہ میں جنگجوؤں کے ان ٹھکانوں پو توپخانے سے گولہ باری کی جہاں سے عراقی افواج پر گولہ باری کی جاری تھی۔

	بصرہ میں بمباری کے دوران عراقی خواتین کی آہ زاری

اس دوران یہ خبریں بھی ملی ہیں کہ امریکی طیاروں نے بصرہ پر حملے کیے ہیں۔ ان کا کہنا ہےکہ وہ شدت پسندوں کے ٹھکانوں کو نشانہ بنا رہے ہیں۔

وزیر اعظم نورالمالکی نے مہدی ملیشیا کو پیسے لے کر ہتھیار ڈالنے کے لیے پہلے بہّتر گھنٹے یا تین دن کی مہلت دی تھی اور کہا تھا کہ اگر اس مدت میں ہتھیار نہیں ڈالے گئے تو نتائج کی ذمہ داری ہتھیار نہ ڈالنے والوں پر ہوگی لیکن اس کے بعد اس مہلت میں مزید دس دن کی توسیع کر دی گئی۔

مہدی ملیشیا کے ایک سینیئر اہلکار حارث الاطہری نے بصرہ میں بی بی سی کو بتایا کہ وہ اس عراقی حکومت کے سامنے ہتھیار ڈالیں گے جو عراق پر امریکی قبضہ ختم کرے گي۔

عراق کے شہر نجف میں واقع مہدی ملیشیا کے ہیڈکوارٹر کے ایک اہلکار حیدر الجباری نے بھی اس بات کی تصدیق کی ہے کہ انہیں ہتھیار نہ ڈالنے کا حکم دیا گیا ہے۔ انہوں نے خبر رساں ایجنسی اے ایف پی کو بتایا کہ ’مقتدی الصدر نے ہمیں اس وقت تک ہتھیار نہ ڈالنے کے لیے کہا ہے جب تک امریکہ کو ملک سے باہر نہ پھینک دیا جائے۔‘