امریکی حملے کے بعد فرقہ ورانہ فسادات میں بھی سینکڑوں ہلاکتیں ہوئی ہیں

امریکی اور عراقی اہلکاروں کا کہنا ہے کہ اس اجتماعی قتل کے ذمہ داران کا تعین نہیں ہو سکا ہے تاہم یہ قبر دو ہزار تین میں عراق پر امریکی حملے کے بعد کی بھی ہو سکتی ہے۔

ایک امریکی فوجی ترجمان کا کہنا ہے کہ یہ لاشیں زیادہ تر ڈھانچوں میں تبدیل ہو چکی ہیں جس سے ظاہر ہوتا ہے کہ یہ بہت عرصے تک یہاں پڑی رہی ہیں۔

عراقی فوج کے اہلکار میجر جنرل عبدل کریم الربائی نے مزید بتایا کہ مرنے والوں کو شناخت کرنا ممکن نہیں ہے۔ فرانسیسی خبر رساں ایجنسی اے ایف پی کے مطابق ان کا کہنا تھا کہ’ ہم ان لاشوں کی شناخت نہیں کر سکتے۔یہاں صرف ہڈیاں پڑی ہوئی ہیں۔فی الحال ہم نے ان ہڈیوں کو قبر میں ہی رکھنا مناسب سمجھا ہے‘۔

حقوق انسانی کی تنظیموں کا کہنا ہے کہ عراق میں اس طرح کی کئی اجتماعی قبریں موجود ہیں جن میں سابقہ عراقی صدر صدام حسین کے دور میں قتل کیے گئے ہزاروں لوگوں کی لاشیں دفن کی گئی ہیں۔

امریکی حملے کے بعد فرقہ ورانہ فسادات میں بھی سینکڑوں لوگ ہلاک ہوئے ہیں اور حالیہ دنوں میں ایسی قبروں کا ملنا معمول کی بات ہے۔

امریکی اور عراقی حکام ان ہلاکتوں کے لیے القاعدہ کو موردِ الزام ٹھہراتے ہیں۔

برطانوی خبر رساں ایجنسی رائٹرز کے مطابق القاعدہ سے تعلق رکھنے والے شدت پسندوں کے تعاقب میں بھی عراقی شہر سمارا کے قریب تقریباً پچاس لاشوں پر مشتمل ایک اجتماعی قبر دریافت کی گئی تھی۔