رفاہ میں حماس کے کارکن مصر سے ملنے والی سرحد کی نگرانی کر رہے ہیں

یہ اعلان اسرائیلی سپریم کورٹ کے اس فیصلے کے بعد کیا گیا ہے جو انسانی حقوق کے لیے کام کرنے والے گروپوں کی جانب سے غزہ کی فراہمی بند کرنے کے خلاف دی گئی درخواست پر دیا گیا ہے۔

اسرائیل غزہ کے واحد بجلی گھر کو دو اعشاریہ دو ملین لیٹر تیل فراہم کرے گا جو اس کی کم سے کم ضروریات پوری کرنے کے لیے درکار ہوتا ہے۔

اس کے علاوہ اسرائیلی ناکہ بندی کے باعث غزہ میں دیگر اشیائے ضرورت کی بھی شدید قلت ہے جس کے بعد حماس کے شدت پسندوں نے مصر سے ملنے والی سرحد کو کئی مقامات سے توڑ دیا ہے تاکہ لوگ ان اشیاء کو حاصل کے لیے آزادانہ آ جا سکیں۔

مصر نے اس سلسلے میں کثیر فریقی مذاکرات کا اہتمام کیا ہے اور حماس اور فتح کو سرحد توڑنے جانے سے پیدا ہونے والے بحران پر مذاکرات میں شرکت کے لیے کہا ہے۔

ادھر اسرائیل میں فلسطینی اور اسرائیلی رہنما غزہ میں بدنظمی اور پانچ روز قبل مصر کی سرحد توڑے جانے پر بات چیت کرنے کے لیے ملاقات کر رہے ہیں۔

اس بات چیت کے لیے فلسطینی صدر محمود عباس اسرائیلی وزیراعظم ایہود اولمرت کی رہائشگاہ واقع یروشلم پہنچ چکے ہیں اور توقع کی جا رہی ہے کہ اس بات چیت کے دوران وہ اسرائیلی وزیراعظم سے غزہ میں سرحدی نقل و حمل اور انتظام اپنی سکیورٹی افواج کے حوالے کرنے کے لیے کہیں گے۔

فلسطینی صدر کے معاونین کا کہنا ہے کہ اس اقدام سے غزہ میں نظم قائم کرنے میں آسانی ہو گی لیکن نامہ نگاروں کا کہنا ہے کہ یہ واضح نہیں ہے کہ اگر یہ معاہدہ ہو جاتا ہے تو فلسطینی صدر اس پر حماس کی تائید کے بغیر کیسے عمل کریں گے کیونکہ غزہ پر حماس کا کنٹرول ہے۔

سرکاری طور پر اسرائیلی حکام کا کہنا ہے کہنا ہے کہ اگر فلسطینی صدر کی جانب سے ایسی کوئی تجویز پیش کی گئی تو اس پر غور کیا جا سکتا ہے لیکن بعض حکام نے نجی طور پر اس تجویز کی منظوری کے امکان کو مسترد کیا ہے۔