’اسرائیلی ناکہ بندی کے بعد طبی سہولیات تیزی سے کم ہو رہی ہیں‘

اقوام متحدہ نے اسرائیل کی طرف سے ناکہ بندی کو انسانی حقوق کے بنیادی تقاضوں کے خلاف قرار دیا ہے۔

اس صورتحال پر تبصرہ کرتے ہوئے اسرائیل نے جو غزہ میں ساٹھ فیصد بجلی براہ راست فراہم کرتا ہے کہا ہے کہ فلسطینی مبالغہ آرائی سے کام لے رہے ہیں۔

اقوام متحدہ کا کہنا ہے کہ غزہ کے پندرہ لاکھ لوگوں کو شدید مشکلات کا سامنا ہے۔ غزہ سے ملنے والی اطلاعات کے مطابق لوگ موم بتیاں، بیٹریاں اور خوراک جمع کرنے کی کوشش کر رہے ہیں۔

غزہ میں ایک سبزی فروش نے خبر رساں ایجنسی اے پی کو بتایا کہ خریداری میں تیزی دیکھنے میں آ سکتی ہے لیکن لوگوں کے پاس زیادہ کچھ لینے کے لیے پیسے نہیں۔

توانائی کی فراہمی کے ذمہ دار فلسطینی ادارے نے بتایا کہ بجلی کے پلانٹ کے دو ٹربائن اتوار کی صبح بند کر دیے گئے تھے اور پلانٹ کو آئندہ چوبیس گھنٹوں میں بند کر دیا جائے گا۔

شدید سرد موسم کے دوران بجلی کی مانگ معمول سے زیادہ ہے۔ اس کے علاوہ نکاسی آب کا نظام، ہسپتال اور خوراک جمع کرنے کی سہولیات متاثر ہوں گی۔

اسرائیلی وزارت داخلہ کے ایک ترجمان نے بتایا کہ پاور پلانٹ کی بندش آرام دہ نہیں لیکن اسے انسانی بحران نہیں کہا جا سکتا۔ انہوں نے کہا کہ پاور پلانٹ کو چلانے کے لیے ضروری ایندھن دستیاب ہے۔

اسرائیلی فوج کا کہنا ہے کہ منگل کو کارروائی شروع ہونے کے بعد سے اسرائیلی آبادیوں پر دو سو سے زیادہ راکٹ گر چکے ہیں۔ اس نے کہا کہ اسرائیل کی فوجی کارروائی کے دوران اٹھارہ فلسطینی ہلاک ہوئے ہیں۔

حماس نے لندن میں القدس پریس نامی خبر رساں ایجنسی کو بتایا کہ پابندیوں کی وجہ سے ان کے اسرائیل پر حملے بند نہیں ہوں گے۔