عمر آفریدی بی بی سی اردو ڈاٹ کام، کابل

	اگرچہ شہر میں تباہ حال خطے زیادہ نظر آتے ہیں پھر بھی آنکھوں کو خیرہ کرنے والے ہوٹل اور شاپنگ پلازا پر نظر پڑ جاتی ہے

تو اب فقط اتنا شہر ہی دیکھ پایا ہوں جتنا کہ ائرپورٹ سے سرینا ہوٹل، وہاں سے شہرِنو اور پھر انٹرکانٹیننٹل کے راستے میں پڑتا ہے۔

شہر دیکھنے کا اشتیاق مجھے یوں تھا کہ میں دیکھنا چاہتا تھا کہ تین سال پہلے میں جس تیزی سے تعمیر ہوتی عمارتوں کو ادھورا چھوڑ کر آیا تھا اب ان کی کیا صورت نکلی ہے۔ میں سال دوہزار چار میں افغانستان کے صدارتی انتخابات کی کوریج کے لیے آیا تھا۔

میں جس ہوٹل میں ٹھہرا ہوں اس وقت صرف اس کا ڈھانچہ کھڑا تھا اور اب ہوٹل کے اندر داخل کے بعد لگتا ہے کہ میں کسی انتہائی ترقی یافتہ ملک کے کسی شاپنگ پلازہ پلس ہوٹل میں مہمان ہوں۔ ہاں مگر ہوٹل کے دروازے سے نکلتے ہی چار سو مسلح گارڈز دیکھ کر لگتا ہے کہ جیسے کوئی کہہ رہا ہو ’ذرا سنبھل کے!‘

اگرچہ شہر میں تباہ حال خطے زیادہ نظر آتے ہیں پھر بھی آنکھوں کو خیرہ کرنے والے ہوٹل اور شاپنگ پلازا پر نظر پڑ جاتی ہے۔ البتہ مجموعی تاثر ایک مفلس شہر کا ہی ابھرتا ہے۔ مگر میرے خیال میں صورتحال جلد بدل جائے گی۔

	’کہتے ہیں کہ کابل ایک زمانہ میں بڑا ماڈرن شہر تھا‘

امریکی ڈالر یہاں کا مقبول سکہِ رائج الوقت ہے۔ راستے میں کہیں کہیں سے انڈیا کے پرانے گانے بھی سنائی دے جاتے ہیں۔ جس کا مطلب ہوا کہ امریکی موسیقی نے ابھی افغانوں کے دل میں گھر نہیں کیا۔