کچھ افریقی ممالک کی بالغ آبادی کا 40 فیصد انفیکشن سے متاثر ہے

یہ بات تو کافی عرصے سے عام ہے کہ افریقہ کے صحرائے صحارا سے متعلقہ علاقے کے مسلمان مردوں میں ایچ آئی وی کی شرح غیر مسلموں کے مقابلے میں کم ہے تاہم اب تک یہ واضع نہیں تھا کہ اس کی وجہ ختنہ کروانا ہے یا کم جنسی اختلاط۔

اب کینیا اور یوگنڈا سے ملنے والے نئے شواہد سے یہ بات سامنے آئی ہے کہ نوجوانوں کے ختنہ کروانے سے ایچ آئی وی کا خطرہ ساٹھ فیصد کم ہو جاتا ہے۔ اس تحقیق میں کینیا اور یوگنڈا کے دو ہزار مردوں نے حصہ لیا جن میں سے نصف ختنہ شدہ تھے۔

افریقہ میں صحرائے سہارا سے جڑے کچھ ممالک کی بالغ آبادی میں ایچ آئی وی انفیکشن سے متاثرہ افراد کی شرح چالیس فیصد تک ہے اور وہاں ختنہ کو اس انفیکشن کے پھیلاؤ پر قابو پانے کے لیے بطور اہم ذریعہ استعمال کیا جا سکتا ہے۔

	اب تک دنیا میں ڈھائی کروڑ افراد ایڈز کا شکار ہو چکے ہیں

تاہم ماہرین کا کہنا ہے کہ ختنہ کا عمل تجربہ کار جراحوں کو انجام دینا چاہیے اور اس کے ساتھ ساتھ لوگوں کو اس بارے میں تعلیم دینے کی بھی ضرورت ہے۔

سڈنی میں ہونے والی کانفرنس میں شامل ایک سو تیس ممالک کے مندوبین پر ایچ آئی وی پر تحقیق میں اضافے کے حوالے سے ایک اعلامیے پر دستخط کرنے کے لیے بھی زور دیا جائےگا۔

سڈنی اعلامیے میں شامل اہم تجویز کے مطابق ایچ آئی وی پروگرامزکے لیے مختص رقم کا کم از کم دس فیصد تحقیق کے میدان میں خرچ کیا جانا چاہیے۔

اعلامیے میں حکومتوں پر بھی زور دیا گیا ہے کہ وہ ایڈز جیسے موذی مرض سے نمٹنے کے لیے مزید وسائل مختص کریں تاکہ نئی ادویات کی تیاری، مرض کی تشخیص اور علاج کے حوالے سے مزید بہتر کام کیا جا سکے اور اب تک دنیا میں ڈھائی کروڑ افراد کو ہلاک کرنے والی اس بیماری پر قابو پایا جا سکے۔