اینڈرو سٹِمپسن کے جسم میں ایڈز کی تشخیص سنہ 2002 میں ہوئی تھی

اینڈرو سٹِمپسن کو اگست دو ہزار دو میں ایڈز یا ایچ آئی وی پازیٹیو تشخیص کیا گیا تھا تاہم اگلے ہی برس ٹیسٹ سے پتہ چلا کہ ان کے جسم سے ایڈز کا وائرس ختم ہوگیا ہے۔

ماہرین کا کہنا ہے کہ اگر مزید تحقیق سے ان کی صحتیابی کی تصدیق ہو جاتی ہے تو سٹِمپسن اس مرض سے نجات پانے والے پہلے شخص ہوں گے۔

ایڈز کی تشخیص کے بعد سٹِمپسن پر افسردگی چھا گئی تھی اور جب بعد کی تشخیص نے انہیں صحتمند ثابت کیا تو انہوں نے متعلقہ لیبارٹری سے پہلی مرتبہ غلط تشخیص کرنے پر ہرجانہ طلب کیا۔ مگر انہیں بتایا گیا کہ تشخیص کے عمل میں کوئی خرابی نہیں تھی۔

سٹِمپسن کا کہنا تھا کہ’ دنیا میں ایڈز کے پینتیس ملین سے زیادہ مریض ہیں اور میں وہ واحد شخص ہوں جس نے اس پر قابو پا لیا اور اس سے بچ نکلا۔ میرے لیے یہ ناقابلِ یقین ہے۔ یہ ایک معجزہ ہے اور میں دنیا کے خوش قسمت ترین لوگوں میں سے ایک ہوں‘۔