یہ لاشیں مغربی عراق میں رمادی کے نزدیک برآمد ہوئی ہیں۔

گزشتہ سال مئی میں ٹیم کے پندرہ ارکان کو بغداد کے مغرب میں القاعدہ کے غلبے والےصوبہ عنبار سے اغوا کیا گیا تھا۔ یہ لوگ اردن میں ٹریننگ کیمپ سے واپس آرہے تھے۔

یہ لاشیں مغربی عراق میں رمادی کے نزدیک برآمد ہوئی ہیں۔ٹیم کے دو رکن اب بھی لاپتہ ہیں۔

گزشتہ دو برسوں میں مغربی عراق میں فرقہ وارانہ حملوں میں کھیلوں سے متعلق کئی عراقی اہلکاروں کو اغوا کیا جا چکا ہے۔

عراقی پولیس کے مطابق یہ لاشیں سنی عنبار سالویشن کونسل کے لوگوں کو ملی ہیں یہ گروپ صوبے میں القاعدہ کے خلاف لڑ رہا ہے۔

ٹیم کے باقیات میں کھوپڑیاں ہڈیاں اور یونیفارم کے ٹکڑے برآمد ہوئے ہیں جنہیں ڈی این اے ٹیسٹ کے لیے بغداد کے ایک ہسپتال بھیجا گیا۔

عراق کی نیشنل اولمپکس کمیٹی کے سیکرٹری جنرل حسین العبیدی نے خبر رساں ایجنسی اے پی کو بتایا ک یہ ایتھلیٹس ایک کلب کے ممبر تھے جو اولمپکس کے لیے کھلاڑی تیار کر رہا تھا۔

حسین العبیدی نے کہا کہ ’ہم امید کر رہے تھے کے ایک دن یہ ایتھلیٹس صحیح سلامت واپس آ جائیں گے اور ہم انہیں بین الاقوامی مقابلوں میں ملک کے لیے کھیلتے ہوئے دیکھ سکیں گے‘۔

	عراق میں کئی ایتھلیٹس اور کھیلوں سے متعلق اہلکاروں کو اغوا کیا جا چکا ہے

ان ایتھلیٹس کی آخری رسومات میں شرکت کے لیے صدر میں سینکڑوں لوگ جمع ہوئے انہیں نجف میں دفن کیا جائے گا۔

گزشتہ سال عراق کے انٹر نیشنل فٹبال ریفری ، عراقی اولمپکس فٹبال ٹیم کے ممبر اور ایک نیشنل والی بال کھلاڑی کو اغوا کیا گیا تھا۔

ان میں سے کچھ فرقہ وارانہ حملوں کے شکار ہوئے جبکہ کچھ کو تاوان کے لیے اغوا کیا گیا اور کچھ ان اسلامی شدت پسندوں کے ہاتھ لگے جو ان کی سرگرمیوں کو مناسب نہیں سمجھتے۔