ارجمند بانو بی بی سی اردو سروس، لندن

	مظاہرہ چھ روزہ جنگ کی چالیسویں سالگرہ کے موقع پر منعقد کیا گیا

ہزاروں کے قریب مظاہرین جو آزادئ فلسطین کے لیے آواز اٹھانے کے لیے برطانیہ کے دوسرے شہروں سے جمع ہوئے تھے، لندن کی سڑکوں سے ہوتے ہوئے ٹرافالگر سکوئر پہنچے۔

ٹرافالگر سکوئر پر دن کے خاتمے تک تقریروں کا سلسلہ جاری رہا۔ یہ احتجاجی مظاہرہ مشرق وسطیٰ کی چھ روزہ جنگ کی چالیسویں سالگرہ کے موقع پر یادگاری تقریبات کا حصہ تھا۔

اس مظاہرے کا اہتمام تقریبا پچاس کے قریب تنظیموں کے ایک اتحاد نے کیا تھا۔ اینف یعنی ’بہت ہوچکا‘ نامی اس اتحاد میں حقوق انسانی اور مذہبی تنظیموں کے علاوہ ٹریڈ یونین اور پارلیمانی اراکین اور جارج گیلووے کی سیاسی جماعت ریسپیکٹ شامل تھیں۔

انفرادی طور پر تقریبا سبھی بڑی سیاسی جماعتوں کے پارلیمانی اراکین بھی اس مظاہرے میں شامل تھے۔

	مظاہرین نے فلسطین سے اسرائیلی انخلاء کا مطالبہ کیا

اس اتحاد کے مقاصد میں موجودہ فلسطینی انتظامیہ کا بائیکاٹ ختم کرانے، اس کی مالی امداد بحال کرنے اور اسرائیلی اشیاء کا بائیکاٹ کرنے کے لیے دباؤ بڑھانا ہے۔

سنیچر کے روز مظاہرے کے آخر میں ٹرافالگر سکوئر پر جلسے کو خطاب کرنے والوں میں جاجر گیلووے اور فلسطینی وزیراطلاعات مصطفیٰ برغوتی کے علاوہ سابق اسرائیلی فوجی نیتن سِلورمین بھی شامل تھے جنہوں نے فلسطینی شہری علاقوں پر فوجی حملے کرنے سے انکار کردیا تھا اور اب فلسطینی حقوق کے لیے سرگرم ہیں۔