فوجی کمک کے لیے چینوک ہیلی کاپٹر خاصا کارآمد ہے۔

فوجی حکام کے مطابق بظاہر یہ ہیلی کاپٹر دشمن کی فائرنگ سے تباہ ہوا ہے۔

یہ واقعہ مقامی وقت کے مطابق رات نو بجے کے قریب جنوبی صوبہ ہلمند کے علاقے کجاکی میں پیش آیا۔

طالبان نے اس چینوک ہیلی کاپٹر کو مار گرانے کی ذمہ داری قبول کر لی ہے۔ انٹرنیشنل سکیورٹی اسِسٹینس فورس یا آئی سیف کا کہنا ہے کہ علاقے میں دشمن جنگجو موجود ہیں اور ہلاک ہونے والوں کی باقیات حاصل کرنے کے لیے طالبان کے ٹھکانوں کو نشانہ بنایا جا رہا ہے۔

ہلاک ہونے والوں میں پانچ عملے کے ارکان اور دو فوجی مسافر شامل ہیں۔ اگرچہ نیٹو حکام نے ہلاک ہونے والوں کی قومیت کے بارے میں تفصیلات جاری نہیں کی ہے تاہم خیال ہے کہ عملے کے پانچوں ارکان امریکی تھے جبکہ دوسرے دو فوجیوں کا تعلق کسی دوسرے ملک سے ہے۔

نیٹو کے ترجمان کا کہنا ہے کہ اس بات کی تحقیقات کی جا رہی ہیں کہ ہیلی کاپٹر کو کس ہتھیار سے نشانہ بنایا گیا ہے۔ خیال ہے کہ اس حملے میں راکٹ سے داغا جانے والا گرینیڈ استعمال کیا گیا ہے۔

صوبہ ہلمند میں برطانوی فوج تعینات ہے۔

افغانستان میں فائرنگ کرکے ہیلی کاپٹر گرائے جانے کے واقعات مقابلتاً کم پیش آتے ہیں۔