ٹونی بلیئر کا عراق کا یہ ساتواں اور غالباً آخری دورہ ہے

ٹونی بلیئر کےبغداد کے گرین زون میں پہنچنے کے کچھ گھنٹے بعد ہی وہاں راکٹ حملہ کیا گیا تھا۔افسران کا کہنا ہے ایسا نہیں لگتا کہ اس حملے کا نشانہ ٹونی بلیئر تھے۔

ٹونی بلیئر کا عراق کا یہ ساتواں اور غالباً آخری دورہ ہے کیونکہ اگلے ماہ وہ اپنے عہدے سے دستبردار ہو رہے ہیں۔

گرین زون پر راکٹ حملے کے بارے میں ٹونی بلئیر کے ترجمان نے کہا کہ ’اس طرح کے راکٹ حملے معمول کی بات ہیں اور ہمارے پاس ایسی کوئی اطلاعات بھی نہیں ہیں جس سے شبہ کیا جائے کہ اس کا نشانہ وزیر اعظم تھے‘۔

بی بی سی کے نامہ نگار پال وڈ نے بتایا کہ مقامی وقت کے مطابق صبح ساڑھے آٹھ بجے اس علاقے پر ایک راکٹ حملہ ہوا جہاں سے صرف ایک میل کے فاصلے پرٹونی بلیئر عراقی رہنماؤں سے ملاقات کر رہے تھے۔اس حملے میں ایک گارڈ ہلاک ہوا ہے۔

توقع ہے کہ اپنے اس دورے میں بلیئر عراق کےشیعہ اور سنی دھڑوں کے درمیان مفاہمت پر زور دیں گے۔عراق کے شیعہ اور سنی رہنما عراق کے منتخب افسران کے ساتھ ہر روز ملاقاتیں کر رہے ہیں۔

ٹونی بلیئر کے ترجمان کا کہنا ہے کہ وزیر اعظم اپنے اس دورے میں سیاست اور سکیورٹی کے بنیادی تعلق پر زور دینا چاہیں گے۔

انہوں نے کہا کہ بلیئر کےاس دورے کا مقصد عراق میں طویل مدتی امن قائم کرنے کی کوششوں کو تقویت پہنچانا ہے۔

ٹونی بلیئر پر یہ الزام لگایا جاتا رہا ہے کہ انہوں نے برطانیہ کو ایک غیر قانونی جنگ میں دھکیلا ہے روزنامہ’ آبزرور‘ کے حالیہ جائزے کے مطابق 58 فیصد لوگوں کا خیال ہے کہ عراق پر حملہ ایک غلطی تھی۔

ٹونی بلیئر نے اس ہفتے واشنگٹن میں کہا تھا’ہم نے ایک ایسا فیصلہ لیا جو ہمارے خیال میں بہت مشکل تھا ، مجھے اس وقت ایسا لگا تھااور آج بھی ایسا لگتا ہے کہ یہ فیصلہ درست تھا‘۔