2005 کے بم دھماکوں کی ذمہ داری کالعدم تنظیم جماعت الجاہدین پر ڈالی گئی تھی

ان چھ افراد میں کالعدم اسلامی تنظیم جماعت المجاہدین (جے ایم بی) ، بنگلہ دیش کے سربراہ عبدالرحمٰن اور ان کے نائب صدیق السلام بھی شامل ہیں۔ صدیق کو بنگلہ بھائی کے نام سے جانا جاتا ہے۔

پولیس کا کہنا ہے کہ ان چھ افراد کو ملک کی مختلف جیلوں میں پھانسی پر لٹکایا گیا۔

نومبر 2005 میں بنگلہ دیش میں ججوں پر کیا جانا والا حملہ ملک بھر میں کیے جانے والے سلسلے وار بم دھماکوں کا حصہ تھا جس کی ذمہ داری کالعدم تنظیم جماعت الجاہدین پر ڈالی گئی تھی۔

مقدمہ کے دوران ان افراد کا کہنا تھا کہ انہوں نے ججوں کو حملوں کا نشانہ اس لیے بنایا کیونکہ عدالتی نظام شرعی کی بجائے سیکولر قانون کے تحت چلایا جا رہا تھا۔

سپریم کورٹ نے گزشتہ سال ان افراد کی رحم کی اپیل مسترد کردی تھی اور صدر ایاز الدین نے بھی اس ماہ کے آغاز میں ان افراد کی رحم کی اپیل کو نامنظور کردیا تھا۔

محکمۂ جیل کے انسپکٹر جنرل بریگیڈئر ذاکر حسن نے خبر رساں ادارے اے ایف پی کو بتایا کہ ان چھ افراد کو چار مختلف جیلوں میں پھانسی دی گئی۔ بعدازاں ان کی لاشیں ان کے ورثاء کے حوالے کردی گئیں۔

واضح رہے کہ بنگلہ دیش میں اگست 2005 میں ایک گھنٹے کے دوران کوئی 500 کے قریب بم دھماکے کیے گئے تھے جس میں کم از کم تیس افراد ہلاک ہو گئے تھے۔ ان میں سے کئی دھماکوں کا نشانہ عدالتی کمرے اور جج تھے۔

ان بم دھماکوں کے سلسلے میں کالعدم تنظیم جے ایم پی کے مبینہ اراکین کے خلاف کوئی ایک سو سے زائد کیس فائل کیے گئے تھے۔

بنگلہ دیش میں بی بی سی کے نامہ نگار کا کہنا ہے کہ حکومت کو خدشہ ہے کہ کالعدم تنظیم کے کارکن اِن پھانسیوں کے خلاف کوئی جوابی قدم اٹھا سکتے ہیں۔