مظاہرین کا کہنا تھا مستقبل میں امن کا انحصار معافی دینے یا نہ دینے پر ہے

افغانستان کے دارالحکومت کابل میں تقریباً پچیس ہزار افراد نے ان فوجی کمانڈروں اور جنگجوؤں کے لیے عام معافی کے حق میں مظاہرہ کیا جن کے بارے میں کہا جاتا ہے کہ انہوں نے جنگی جرائم کا ارتکاب کیا تھا۔

جنگی مجرم، عام معافی بل منظور

مظاہرین نے ان افراد کے لیے عام معافی کی حمایت میں نعرہ بازی کی۔

کابل کا نیشنل سٹیڈیم مظاہرین سے بھرا ہوا تھا اور وہ ان مجاہدین رہنماؤں کے حق میں نعرہ بازی کر رہے تھے جو اسّی کی دہائی میں سوویت یونین کے قبضے کے خلاف لڑے اور بعد میں خانہ جنگی میں حصہ لیا۔

مظاہرین میں اعلیٰ حکومتی عہدیداروں کے علاوہ سابق مجاہدین کی بڑی تعداد شامل تھی۔ اس موقع پر خطاب کرتے ہوئے مجاہدین کے ایک رہنما عبدالرسول سیاف نے کہا ’جو لوگ مجاہدین کے خلاف بات کرتے ہیں وہ اسلام اور اس ملک کے دشمن ہیں۔‘

عبدالرسول سیاف ان کئی کمانڈروں میں سے ایک ہیں جن پر خانہ جنگی کے دوران جنگی جرائم کے ارتکاب کا الزام ہے۔

مظاہرین ایسے لوگوں کے لیے سزائے موت کا مطالبہ کر رہے تھے جو ماضی کے جنگجوؤں کے خلاف مقدمے قائم کرنے کی بات کر رہے ہیں۔

	کہا جاتا ہے کہ حامد کرزئی عام معافی کے حق میں نہیں

رواں ہفتے کے اوائل میں افغانستان کی پارلیمان نے مذکورہ افراد کے لیے عام معافی کا ایک بِل منظور کیا لیکن صدر حامد کرزئی کے ترجمان نے بعد میں اشارہ دیا تھا کہ وہ پارلیمان کے اس اقدام کو غیر آئینی سمجھتے ہیں۔

اقوام متحدہ اور انسانی حقوق کی تنظیموں نے بھی اس بِل پر شدید تنقید کی ہے۔

جلسے کے بعد نوجوان مظاہرین نے کابل کی سڑکوں اور گلیوں میں مارچ کیا۔ اس موقع پر وہ ’افغانستان کے دشمن مردہ باد‘ ’امریکہ مردہ باد‘ اور ’ملالائی جویا مردہ باد‘ کے نعرے لگا رہے تھے۔ واضح رہے کہ ملالائی جویا پارلیمان کی ان خاتون رکن کا نام ہے جو عبدالرسول سیاف اور مجاہدین کے دیگر بڑے رہنماؤں پر شدید تنقید کے لیے مشہور ہیں۔

بظاہر لگتا ہے کہ جمعہ کے مظاہرے کا مقصد صدر حامد کرزئی پر دباؤ ڈالنا تھا کہ وہ عام معافی کے بِل پر دستخط کر دیں تا کہ اسے قانونی حیثیت حاصل ہو جائے۔

معافی کے حامی  افغانستان میں عام معافی کے حامی لوگوں کا خیال ہے کہ یہ صلح اور باہمی تعلقات میں بہتری کی جانب ایک قدم ہوگا اور اگر عام معافی نہیں دی جاتی تو ملک میں مزید لڑائی ہوگی۔

مظاہرے میں حکومت اور پارلیمان کے جن چیدہ چیدہ ارکان نے شرکت کی ان میں عبدالرسول سیاف کے علاوہ ملک کے نائب صدر کریم خلیلی، حامد کرزئی کے سینیئر سکیورٹی مشیر محمد قاسم فہیم، فوج کے ایک چیف آف سٹاف عبدالرشید دوستم، توانائی کے وزیر اسماعیل خان اور سابق صدر برہان الدین ربانی بھی شامل تھے۔

سوویت یونین کے خلاف جنگ مجاہدین کی جنگ میں دس لاکھ سے زائد افراد ہلاک ہوئے تھے جبکہ سوویت فوجوں کے انخلاء کے بعد مجاہدین کے مختلف دھڑوں کے درمیان خانہ جنگی اور اس کے بعد طالبان کے دور حکومت کے دوران مجموعی طور پر ہزاروں لوگ مارے گئے۔

مجاہدین اور دیگر جنگجوؤں کے درمیان لڑائیوں میں صرف کابل میں اسّی ہزار لوگ مارے گئے تھے۔

گزشتہ ہفتے پارلیمان سے عام معافی کا بِل منظور کرنے والے کچھ ارکان کا اب کہنا ہے کہ جب وہ بِل کے حق میں ووٹ دے رہے تھے اس وقت انہیں معلوم نہیں تھا کہ اس کے کیا اثرات مرتب ہوں گے۔

افغانستان میں عام معافی کے حامی لوگوں کا خیال ہے کہ یہ صلح اور باہمی تعلقات میں بہتری کی جانب ایک قدم ہوگا اور اگر عام معافی نہیں دی جاتی تو ملک میں مزید لڑائی ہوگی۔

دوسری جانب اقوام متحدہ اور افغانستان میں انسانی حقوق کی بڑی تنظیموں کا کہنا ہے کہ جنگی جرائم میں معافی کے فیصلے کا حق صرف ان لوگوں کو ہے جو ان ان جرائم سے متاثر ہوئے۔