کہا جاتا ہے کہ افغان صدر حامد کرزئی اس بل کے مخالف ہیں

اس بل کو ایوانِ زیریں نے پہلے ہی منظور کر دیا تھا اور قانون بننے کے لیے اس پر صرف صدر حامد کرزئی کے دستخط ہونا باقی ہیں۔ تاہم اگر صدر کرزئی چاہیں تو اس بل کو ویٹو کر سکتے ہیں۔

سویت حکمرانوں نے افغانستان میں کئی طرح کے مظالم کیے تھے اور افغان مجاہدین کے رہنماؤں پر بھی اسی نوعیت کے الزامات ہیں۔ مجاہدین رہنماؤں نے سویت غلبے کے خلاف جنگ لڑی تھی اور ان کے بعد طالبان آئے تھے۔

تاہم بل کی منظوری اور جنگی جرائم کا ارتکاب کرنے والوں کو معافی دینے کے خیال پر کئی متاثرین نے غم و غصے کا اظہار کیا ہے۔

ایوانِ زیریں میں کئی اراکینِ پارلیمان اب یہ کہتے ہیں کہ جب گزشتہ ماہ انہوں نے اس بل کو منظور کرایا تھا تو انہیں کئی پیچیدگیوں کا پتہ ہی نہیں چلا۔

عام معافی کے طرفداروں کا کہنا ہے کہ اس بل کی منظوری کا مقصد مفاہمت ہے کیونکہ اگر ایسا نہیں کیا گیا تو افغانستان میں مزید جنگ ہوگی۔

کہا جاتا ہے کہ صدر حامد کرزئی اس بل کے مخالف ہیں۔

جنگ کے دنوں میں صرف کابل میں تقریباً اسی ہزار عام لوگ ہلاک ہوئے تھے۔ لاتعداد کو اغواء کر لیا گیا تھا اور کئی خواتین کو ریپ کیا گیا تھا۔

اقوامِ متحدہ اور افغانستان میں حقوقِ انسانی کے گروپوں کا کہنا ہے کہ صرف ظلم کا شکار ہونے والوں کو یہ حق ہے کہ وہ ظلم کا ارتکاب کرنے والوں کو معاف کریں۔