عبدالحئی کاکڑ بی بی سی اردو ڈاٹ کام، پشاور

	افغان پولیس اہلکاروں کو استعفیٰ دینے کی شرط پر رہا کیا گیا ہے: طالبان

طالبان نے اتوار کو صوبہ ہلمند کے شہر واشیر میں ایک حملے کے دوران افغان پولیس کے تیس اہلکاروں کو اسلحہ اور گاڑیوں سمیت پکڑنے کا دعویٰ کیا تھا۔ تاہم افغان حکام نے اس بات کی تردید کی تھی۔

صوبہ ہلمند میں طالبان کمانڈر ملا عبدالرحیم نے بی بی سی اردو ڈاٹ کام کو بتایا کہ افغان پولیس کے ان چوبیس اہلکاروں کو اس شرط پر رہا کیا گیا ہے کہ وہ افغان پولیس سے استعفیٰ دیں گے۔

ملا عبدالرحیم کا مزید کہنا تھا’افغان پولیس کے چار اعلیٰ اہلکار اب بھی ہمارے قبضہ میں ہیں جن کے خلاف مقدمہ چلایاجائےگا اور اگر ان پر قتل یا کوئی اور جرم ثابت ہوا تو انہیں شرعی سزائیں دی جائیں گی جو کوڑوں، پھانسی دینے یا قید میں رکھنے کی صورت میں ہوسکتی ہیں‘۔

جنوبی افغانستان میں طالبان کا اثر و نفوذ زیادہ ہے جہاں افغان حکومت یا اتحادی افواج کےساتھ کام کرنے والوں کی زندگیوں کو ہمہ وقت خطرہ رہتا ہے۔