پیر کی شام سے رکن ممالک نے آخری کوشش کے طور پر مسئلہ کے حل کے لیے کوششیں شروع کیں

مذاکرات میں شریک چینی نمائندے وو داویئی کا کہنا تھا کہ شمالی کوریا اگلے ساٹھ روز کے دوران یانگ بیون میں اپنا جوہری ری ایکٹر بند کردے گا جس کے بدلے اسے 50000 میٹرک ٹن ایندھن کی کھیپ یا پھر اس کے مساوی اقتصادی امداد دی جائے گی۔ اپنا جوہری پروگرام مستقل بنیادوں پر ختم کرنے پر اسے ایک ملین ٹن ایندھن کیایک اور کھیپ دی جائے گی۔

امریکہ اور جاپان نے بھی شمالی کوریا سے ’قریب تر تعلقات‘ کے لیے مذاکرات پر رضامندی ظاہر کردی ہے۔

بین الاقوامی معائنہ کار نیوکلیئر ری ایکٹر کے بند کیے جانے کے عمل کی نگرانی کریں گے۔

چھ ملکی مذاکرات میں امریکہ، چین، جاپان، روس اور شمالی و جنوبی کوریا شریک ہیں۔

تاہم شمالی کوریا کی جانب سے براہ راست معاہدہ طے کیے جانے پر کوئی سرکاری رد عمل اب تک سامنے نہیں آیا ہے۔

چینی نمائندے کا کہنا ہے کہ مذاکرات کے اختتام پر اہم اتفاق رائے ہوگیا ہے۔ انہوں نے یہ بھی کہا کہ امریکہ شمالی کوریا کو ’دہشتگرد ممالک‘ کی فہرست سے خارج کرنے اور اس سے سفارتی تعلقات قائم کرنے پر تیار ہے۔

اس سے قبل امریکہ کے جوہری مذاکرات کار کا کہنا تھا کہ شمالی کوریا کے جوہری پروگرام کے حوالے سے جاری چھ ملکی مذاکرات کے دوران ایک عارضی سمجھوتے پر اتفاق ہوگیا ہے۔

گزشتہ جمعرات سے جاری مذاکرات کے حالیہ دور کا مقصد شمالی کوریا کو اس امر پر راضی کرنا تھا کہ وہ اپنا جوہری پروگرام ترک کر دے۔

بے نتیجہ مذاکرات شمالی کوریا کے جوہری پروگرام کے حوالے سے جاری مذاکرات میں آخری پیش رفت ستمبر 2005 میں ہوئی تھی جب امریکہ اور شمالی کوریا میں معاہدہ طے پایا تھا تاہم یہ معاہدہ عملدر آمد کے طریقۂ کار پر اتفاقِ رائے نہ ہونے کی وجہ سے ناکام ہوگیا تھا۔

ابتدا میں معلوم ہورہا تھا کہ یہ سمجھوتہ ممکن نہیں ہوگا کیونکہ رکن ممالک کے مطابق ان کے مطالبات کے بدلے شمالی کوریا توانائی کی جو امداد طلب کررہا تھا وہ بہت زیادہ تھی۔ تاہم پیر کی شام سے رکن ممالک نے آخری کوشش کے طور پر مسئلہ کے حل کے لیے کوششیں شروع کیں۔

شمالی کوریا کے جوہری پروگرام کے حوالے سے جاری مذاکرات میں آخری پیش رفت ستمبر 2005 میں ہوئی تھی جب امریکہ اور شمالی کوریا میں معاہدہ طے پایا تھا تاہم یہ معاہدہ عملدر آمد کے طریقۂ کار پر اتفاقِ رائے نہ ہونے کی وجہ سے ناکام ہوگیا تھا۔