حماس اور فتح کی جھڑپوں میں گزشتہ چند دنوں میں 30 افراد ہلاک ہوچکے ہیں

وزیر خارجہ محمود ظہر کا کہنا تھا کہ جنگ بندی مقامی وقت کے مطابق منگل کی صبح تین بجے سے نافذ ہو جائے گی۔

حکمران جماعت حماس اور صدر محمود عباس کی فتح پارٹی کے مخالف دھڑوں کے درمیان لڑائی میں گزشتہ چند دنوں کے دوران 30 افراد ہلاک ہوچکے ہیں۔

2006 میں حماس کے اقتدار میں آنے کے بعد سے یہ اب تک کی سب سے شدید لڑائی تھی اور ابھی تک قومی اتحاد کی حکومت کی تشکیل کی کوششیں ناکام رہی ہیں۔

محمود ظہر نے یہ اعلان دونوں دھڑوں کے رہناؤں کے درمیان مذاکرات کے بعد کیا ہے۔ ان مذاکرات میں مصری سفارت کاروں نے ثالثی کی تھی انہوں نے بتایا کہ دونوں ہی دھڑے غزہ کی سڑکوں سے اپنے بندوق برداروں کو واپس بلانے پر رضامند ہو گئے ہیں۔

فتح کی جانب سے جنگ بندی کے بارے میں ابھی تک کوئی بیان جاری نہیں ہوا ہے۔