سب سے بڑی جھڑپ جبیلیہ کے مہاجر کیمپ میں ہوئی

دونوں تنظیموں کے درمیان فلسطین میں قومی اتحاد کی حکومت کی تشکیل کے حوالے سے ہونے والی بات چیت معطل ہوگئی ہے۔ ایک سال قبل حماس کے حکومت سنبھالنے کے بعد سے جمعہ کا دن جھڑپوں کے حوالے سے بدترین دن تھا۔

غزہ میں بی بی سی کے نامہ نگار کا کہنا ہے کہ اب بھی اکا دکا فائرنگ کی آواز سنی جاسکتی ہے تاہم مجموعی صورتحال اب بہتر ہوتی نظر آرہی ہے۔

جمعہ کی رات غزہ کی گلیوں میں فائرنگ اور دھماکوں کی آوازیں گونجتی رہیں۔

جمعرات سے شروع ہونے والی ان جھڑپوں میں گزشتہ دو روز کے دوران سولہ افراد ہلاک ہوئے ہیں۔ فلسطینی ڈاکٹروں کے مطابق ہلاک شدگان میں ایک دو سالہ بچے سمیت دو عام شہری بھی شامل ہیں۔

خبر رساں ادارے رائٹرز کے مطابق الفتح کے ترجمان توفیق ابو خوسہ نے بات چیت کی معطلی کے حوالے سے جاری کردہ بیان میں کہا ہے کہ’ ان حالات میں یہ بات چیت کیسے جاری رہ سکتی ہے جبکہ مذاکرات کی میز کے نیچے بم موجود ہو‘۔

تاہم حماس نے اس ناکامی کا ذمہ دار الفتح کو ٹھہرایا ہے۔ حماس کے ترجمان فوزی برہوم کے مطابق’الفتح تنظیم قاتلوں کو گروہی، سیاسی اور میڈیا کے حوالے سے پناہ فراہم کر رہی ہے۔ اس لیے حماس نے الفتح کے ساتھ جاری تمام بات چیت معطل کرنے کا فیصلہ کیا ہے‘۔

حماس حکومت کے پہلے سال کی تکمیل پر غزہ میں ہونے والی جھڑپوں میں بندوقوں اور بموں کا استعمال کیا گیا۔ اطلاعات کے مطابق اس دوران حماس اور الفتح کے متعدد کارکنوں کو اغواء بھی کیا گیا ہے۔

ان حالات میں یہ بات چیت کیسے جاری رہ سکتی ہے جبکہ مذاکرات کی میز کے نیچے بم موجود ہو۔ ترجمان الفتح، توفیق ابو خوسہ

سب سے بڑی جھڑپ جبیلیہ کے مہاجر کیمپ میں ہوئی جہاں حماس کے مسلح کارکنوں نے الفتح تنظیم کے ایک مقامی رہنما کے گھر کا محاصرہ کر لیا۔ بعد ازاں حماس کے کارکن اس گھر میں گھس گئے اور اس واقعے میں دو افراد ہلاک ہوئے۔

الفتح سے تعلق رکھنے والے شدت پسندوں کے مطابق انہوں نے جواباً حماس کے انیس کارکنوں کو پکڑ لیا جن میں سے چند کو بعد ازاں رہا کر دیا گیا۔

اس کے علاوہ فلسطینی صدر محمود عباس اور وزیرِ خارجہ محمود ظہار کی رہائش گاہوں کے باہر بھی جھڑپوں کا سلسلہ جاری رہا۔ فلسطینی سکیورٹی افواج کے مطابق محمود ظہار کے گھر کو ایک گرینیڈ حملے میں نقصان بھی پہنچا۔

دسمبر کے وسط سے اب تک حماس اور الفتح تنظیم کے درمیان ہونے والی جھڑپوں میں چالیس سے زائد افراد ہلاک ہو چکے ہیں۔