حزب اللہ کی حمایت میں نکلنے والی ایک ریلی

عرب ٹی وی ’الجزیرہ‘ کو دیئے گئے ایک انٹرویو میں راسخ العقیدہ سُنی عالم سلام الاودھے کا کہنا تھا ’عراق میں شیعہ گروہوں کی مضبوط سیاسی حیثیت اور حزب اللہ کی اسرائیل کے خلاف حالیہ کارکردگی سے کئی سنُیوں میں شیعت کے لیئے احترام بڑھ رہا ہے‘۔

سلام الاودھے کا کہنا تھا ’احترام کا یہ جذبہ سنُیوں کو شیعت کی طرف راغب کرنے کے لیئے کارگر ثابت ہورہا ہے‘۔ انہوں نے الزام لگایا کہ سنُیوں کو تشیعت کی طرف مائل کرنے کے لیئے دوسرے ذرائع مثلاً روپے پیسوں کا لالچ اور روزگار کی پیشکش وغیرہ بھی استعمال کیئے جا رہے ہیں۔

انہوں نے ایران کو زبردست تنقید کا نشانہ بناتے ہوئے الزام لگایا کہ وہ ہمسایہ ملک عراق میں شیعہ گروہوں کی مدد کر رہا ہے۔ ’ایران کھلے عام عراقی معاملات میں مداخلت کر رہا ہے اور اس کے کئی ثبوت موجود ہیں‘۔

سلام الاودھے کا کہنا تھا کہ عراق میں شیعہ تنظیموں کی مدد کے لیئے بھاری وسائل استعمال کیئے جا رہے ہیں اور ایرانی خفیہ اداروں کا ایک مضبوط نیٹ ورک بھی وہاں کام کر رہا ہے۔ ’نتیجتاً عراق میں طاقت کا توازن بگڑ گیا ہے اور خود کش حملہ آوروں کو سنُیوں کے خاتمے کے لیئے استعمال کیا جارہا ہے‘۔

سعودی عرب میں اکثریتی آبادی ’وہابی‘ ہے، جسے سنی فرقہ کا ایک انتہائی رجعت پسند مکتبِ فکر سمجھا جاتا ہے، جو شیعوں کو ’مشرک‘ خیال کرتی ہے۔ اس صحرائی سلطنت میں شیعہ فرقہ سے تعلق رکھنے والے افراد آبادی کا صرف دس فیصد ہیں۔