نیٹو کے تحت افغانستان میں تعینات فوجیوں کی تعداد 30000 سے زائد ہوگئی ہے

نیٹو کے سربراہ یاپ دی اوپ شیفر نے بی بی سی کو بتایا کہ نیٹو افغانستان کو پھر سے ’دہشت گردی کا تربیت کیمپ‘ بننے سے روکنے کی مہم میں ہے۔

انہوں نے کہا کہ کچھ اتحادی ممالک مزید فوجی بھیجنے پر راضی ہوگئے ہیں لیکن یہ تعداد 2500 مزید فوجیوں کے ان کے مطالبے سے کم ہے جو وہ افغانستان کے جنوب میں تعینات کرنا چاہتے ہیں۔

افغانستان کے جنوب میں بڑھتی ہوئی طالبان مزاحمت سے حالیہ دنوں میں نیٹو کے کئی فوجی مسلسل مارے جاتے رہے ہیں۔

امریکی فوجی بھی نیٹو کمانڈ کے تحت  فیصلے کے تحت نیٹو کی افواج مشرقی افغانستان میں بھی تعینات کی جائیں گی۔ اس فیصلے کےتحت لگ بھگ 12000 امریکی فوجی بھی نیٹو کمانڈ کے تحت تعینات ہوں گے۔

جمعرات کو کیے جانے والے فیصلے کے تحت نیٹو کی افواج مشرقی افغانستان میں بھی تعینات کی جائیں گی۔ اس فیصلے کےتحت لگ بھگ 12000 امریکی فوجی بھی نیٹو کمانڈ کے تحت تعینات ہوں گے۔

اس طرح افغانستان میں تعینات غیرملکی فوجیوں کی تعداد 32000 ہوجائے گی۔ تاہم نیٹو کے سربراہ مزید 2500 فوجیوں کا مطالبہ کررہے ہیں۔ انہوں نے کہا کہ اس سمت میں ’پیش رفت‘ ہوئی ہے۔

نیٹو کے سربراہ یاپ دی اوپ شیفر کا کہنا تھا کہ افغانستان میں ناکامی کے نتائج کا مطلب ہوگا کہ یہ ملک ’دہشت گردوں کی تربیت اور انسانی حقوق کی خلاف ورزیوں کا اڈہ‘ بن جائے گا۔