بغداد میں ہزاروں شیعہ زائرین جمع ہورہے ہیں

اس سال اس موقع پر شہر میں سخت سکیورٹی کے انتظامات کیئے گئے ہیں۔ جگہ جگہ چیک پوائنٹ قائم ہیں جہاں لوگوں کی تلاشی لی جارہی ہے اور گاڑیاں چلانے پر دو روزہ پابندی عائد کردی گئی ہے۔

گزشتہ برس اجتماع کے موقع پر خودکش حملہ آور کی موجودگی کی افواہیں سن کر بھگدڑ مچنے سے کئی افراد یا تو کچل کر ہلاک ہوئے یا پھر دریائے دجلہ میں ڈوب گئے تھے۔

جمعہ کی رات اجتماع میں شرکت کے لیئے جانے والے سات زائرین فائرنگ میں ہلاک ہوگئے۔ پولیس کا کہنا ہے کہ حملہ آور ایک گاڑی میں سوار تھا۔

عراقی دارالحکومت میں شیعہ اور سنی حلقوں کے درمیان کافی کشیدگی موجود ہے۔ امریکی فوج نے بغداد میں سکیورٹی کے نئے آپریشن کے تحت کئی ہزار زائد فوجی تعینات کردیئے ہیں۔ اس سکیورٹی آپریشن کا حکم وزیر اعظم نوری المالکی کی جانب سے جاری کیا گیا ہے۔

دریس اثناء امریکی اور عراقی فوج نے ایک ’ڈیتھ سکواڈ‘ یا ’موت کے ٹولے‘ کے تین مبینہ کارکنوں کو گرفتار کرلیا ہے جن پر جولائی میں بغداد میں 41 سنیوں کے قتل میں ملوث ہونے کا الزام ہے۔ ان افراد کو جنوبی بغداد کے رشید ضلعے میں چھاپوں کے دوران گرفتار کیا گیا ہے۔

ایک شخص پر نو جولائی کے حملوں کی سربراہی کا الزام بھی ہے جب جعلی چیک پوسٹ قائم کرکے سنیوں کو ان کی گاڑیوں سے باہر نکال کر ہلاک کیا گیا تھا۔

گاڑیوں کی آمدو رفت پر پابندی کے بعد بھی بہت سے زائرین پیدل چل کر مزار تک پہنچیں گے۔

اکتیس اگست کو مزار اور اس سے ملحقہ مسجد پر دستی بموں سے حملہ کیا گیا تھا جس کے بعد وہاں خودکش حملہ آور کی موجودگی کی افواہ پھیل گئی جس کے نتیجے میں ایک ہزار افراد ہلاک ہوئے۔ ہلاک شدگان میں بہت سے بچے اور عورتیں بھی شامل تھے۔ صدام حکومت کے خاتمے کے بعد ایک ہی دن میں اتنے لوگوں کی ہلاکت کا یہ سب سے سنگین واقعہ ہے۔