نئے سیکورٹی انتظامات عراق میں امریکی فوج کی آمد سے اب تک کے سخت ترین اقدامات ہیں۔

نئے منصوبے کے تحت تقریباً چالیس ہزار عراقی اور امریکی سکیورٹی اہلکاروں کو شہر کی گلیوں اور سڑکوں میں تعینات کر دیا گیا ہے۔

شہر میں رات کے کرفیو میں سختی کرنے کے علاوہ جمعہ کی نماز کے اوقات میں سڑکوں پر گاڑیوں میں سفر پر بھی پابندی عائد کی گئی ہے۔ یہ اقدامات صدر بش کی بغداد آمد کے ایک دن بعد اٹھائے گئے ہیں۔

حکومت کو خدشہ ہے کہ ابو مصعب الزرقاوی کی موت کے بعد عراق میں القاعدہ نئے حملوں کی تیاری کر رہا ہے۔

اب بغداد میں رات کا کرفیو رات گیارہ بجے کی بجائے ساڑھے آٹھ بجے شروع ہوا کرے گا۔ بدھ کی صبح بغداد بھر میں سیکورٹی کے اضافی اہلکاروں نے اپنی نئی ذمہ داریاں سنبھال لیں اور شہر کے مختلف حصوں میں نئی چیک پوسٹیں قائم کر دی گئی ہیں۔

شہر کے لوگوں کا کہنا ہے کہ واضح فرق دکھائی دے رہا ہے کیونکہ اب زیادہ گاڑیوں کو روک کر ان کی تلاشی لی جا رہی ہے جس وجہ سے چیک پوسٹوں پر گاڑیوں کی لمبی لمبی قطاریں لگنا شروع ہو گئی ہیں۔

ابھی تک سیکورٹی کی نئی ذمہ داریاں زیادہ تر عراقیوں نے سنبھالی ہیں اور ان مقامات پر امریکی فوجی کم دکھائی دے رہے ہیں۔

سیکورٹی کے نئے انتظامات کے باوجود بدھ کے روز بھی بغداد میں تشدد کی کارروائیں جاری رہیں۔ شہر کے ایک سنی اکثریتی علاقے میں سیکورٹی فورسز اور مظاہرین میں جھڑپ ہوئی تاہم کسی جانی نقصان کی کوئی اطلاع نہیں آئی۔

بغداد کے شمالی علاقے میں ایک کار بم دھماکہ ہوا جس میں کم از کم دو افراد ہلاک جبکہ دس زخمی ہوگئے۔ شمالی بغداد میں ایک اور کار بم بھی پھٹا تاہم اس میں کوئی جانی نقصان نہیں ہوا۔

عراق میں یہ خدشات بڑھتے جا رہے ہیں کہ اپنے رہنما ابو مصعب الزرقاوی کی ہلاکت کے بعد القاعدہ کے لوگ ملک میں نئے حملوں کی تیاری کر رہے ہیں۔ اطلاعات کے مطابق زرقاوی کے جانشین ابو حمزہ المجاہد نے مبینہ طور پر عراق میں ’صلیبیوں اور شیعوں‘ کو شکست دینے کا عہد کیا ہے۔

	عراقی وزیر اعظم نے ایک بار پھر کہا کہ وہ شدت پسندوں سے بات چیت کے لیے تیار ہیں بشرطیکہ ان کے ہاتھ عراقیوں کے خون سے نہ رنگے ہوں۔

نامہ نگار کے مطابق وزیراعظم نوری المالکی یہ بات ثابت کرنے میں سنجیدہ ہیں کہ بغداد میں سیکورٹی کے معاملات پران کی مکمل گرفت ہے تاہم یہ بات بھی سچ ہے کہ منگل کے روز صدر بش کے بغداد پہنچنے کی خبر وزیراعظم کو صرف پانچ منٹ پہلے دی گئی تھی۔ پروگرام کے مطابق صدر بش نے نوری المالکی سے ویڈیو لنک کے ذریعے واشنگٹن سے بات چیت کرنا تھی۔

عراقی وزیر اعظم نے ایک بار پھر اپنی یہ بات دھرائی ہے کہ وہ شدت پسندوں سے بات چیت کے لیے تیار ہیں بشرطیکہ ان کے ہاتھ عراقیوں کے خون سے نہ رنگے ہوں۔