اعجاز مہر بی بی سی اردو ڈاٹ کام، اسلام آباد

	مطیع الرحمان عرف صمد کے سر کی قیمت حکومت نے ایک کروڑ روپے مقرر کر رکھی تھی

مشتبہ گرفتار افراد کون ہیں

طیاروں کی تباہی کا منصوبہ ناکام: آپ کی رائے

حکام کا کہنا کہ طیاروں کو فضا میں تباہ کرنے کے منصوبے پر اگست کے آخری دنوں یا ستمبر کے ابتدا میں عمل ہونا تھا اور القاعدہ نائن الیون کی یاد تازہ کرنا چاہتی تھی لیکن ان کے مطابق جب راشد رؤف گرفتار ہوا تو لندن سے بھی فوری گرفتاریاں کرنا لازمی تھا ورنہ ملوث افراد وہ زیر زمین ہوجاتے یا پھر مجوزہ شیڈول سے پہلے ہی بعض بمبار دس کے بجائے ایک دو طیاروں میں دھماکے کر سکتے تھے۔

گرفتار شدگاں سے ملنے والی معلومات کے بارے میں وزیر داخلہ آفتاب احمد شیر پاؤ اور وزیر اطلاعات محمد علی درانی لاعلمی ظاہر کر رہے ہیں اور بظاہر ایسا لگتا ہے کہ انٹیلی جنس حکام نے انہیں اس بارے میں بات کرنے سے روک دیا ہے۔

یہ پہلا موقع ہے کہ وزارت داخلہ سے متعلق معاملات کے بارے میں وزیر داخلہ کچھ نہیں بتا رہے اور وزارت خارجہ اس بارے میں تحریری بیان جاری کر رہی ہے۔

	امریکی میں ہوائی اڈوں پر مسافروں کے سامان کی کڑی تلاشی ہو رہی ہے۔

پاکستان میں زیر تفتیش مطیع الرحمان کا تعلق بھی صوبہ پنجاب کے ضلع ملتان سے ہے لیکن انہیں کب اور کہاں سے گرفتار کیا گیا ہے اس بارے میں تاحال معلوم نہیں ہوسکا۔

حکام نے بتایا ہے کہ مطیع الرحمان عرف صمد کے سر کی قیمت حکومت نے ایک کروڑ روپے مقرر کر رکھی تھی اور اس بارے میں اٹھارہ اگست سن دو ہزار چار کو ایک اشتہار بھی شائع کرایا تھا۔

انٹیلی جنس ذرائع نے بتایا ہے کہ مطیع الرحمان کا القاعدہ کے گرفتار رہنما ابو فراج اللبی اور صدر مشرف پر حملے کی سازش تیار کرنے والے ہلاک کردہ امجد حسین فاروقی سے بھی قریبی تعلق تھا۔

جیش محمد کے سربراہ مولانا مسعود اظہر جو حکومت کی حفاظتی حراست میں ہیں ان سے بھی انٹیلی جنس حکام پوچھ گچھ کر رہے ہیں۔ جیش محمد کے سربراہ نے لندن سازش سے لاعلمی ظاہر کرتے ہوئے کہا ہے کہ ان کے کچھ ساتھیوں نے علیحدہ علیحدہ گروپ بنالیے تھے اور براہ راست القاعدہ سے رابطے میں تھے۔

بی بی سی کو مختلف ذرائع سے ملنے والی معلومات کے مطابق جیش محمد کے بعض شدت پسندوں نے گزشتہ چند برسوں کے دوران برطانیہ میں بھی اپنے حامی پیدا کر لیے تھے اور سات جولائی والے حملوں میں جیش محمد کے ہی خود کش بمبار تیار کردہ تھے۔

لندن سے پاکستان کے زیرانتظام کشمیر کے شہر میرپور کی بعض بینکوں میں رقم منتقل ہونے کے بارے میں دفتر خارجہ کی ترجمان تسنیم اسلم سے جب پوچھا تو انہوں نے کہا کہ یہ معلومات غلط ہیں اور اخبارات قیاس آرائیوں پر مبنی خبریں شایع ہو رہی ہیں۔

اس بارے میں انٹیلی جنس حکام کا دعویٰ ہے کہ ان بینک اکاؤنٹس میں جو رقم منتقل ہوئی ہے اس کا لندن سازش کے لیے فنڈز فراہم کرنا نہیں بلکہ یہ ٹیکس سے بچنے کا اور منی لانڈرنگ کا کیس ہے۔