لبنانی شہری علاقہ چھوڑ کر شام کی طرف جا رہے ہیں

مشرق وسطی کا بحران: خصوصی ضمیمہ

تنظیم کا کہنا ہے کہ لبنانی شہریوں کو اس وقت کھانے پینے اور ضروریات زندگی کی بنیادی اشیاء کی ضرورت ہے۔

تنظیم نے دونوں اطراف سے جنگ بندی کی اپیل کی ہے تاکہ متاثرہ افراد کے لیے امدادی سرگرمیاں بڑے پیمانے پر شروع کی جا سکیں۔ ہزاروں غیر ملکی افراد ملک چھوڑ کر جار ہے ہیں لیکن لبنانی شہریوں کے لیے کی جانے والی امدادی سرگرمیاں کافی نہیں ہیں۔

ملک میں تیل کی قیمتوں اور متاثرہ خاندانوں کو محفوظ مقام تک لے جانے کے لیے گاڑیوں کے کرایوں میں بھی انتہائی ڈرامائی انداز میں اضافہ ہوا ہے۔

ہزاروں کی تعداد میں لوگ جس میں لبنانی شہری بھی شامل ہیں شام کی سرحد کے پاس جمع ہیں تاکہ اسرائیلی حملوں سے بچنے کے لیئے وہاں پناہ لی جا سکے۔

تنظیم نے لبنان کے سرحدی مقامات پر ان افراد کے لیئے استقبالی مراکز قائم کر دیے ہیں۔ شام میں ریڈ کراس تنظیم نے ان افراد کی عارضی سکونت کے لیے سکولوں کو بطور پناہ گاہ کے بنا دیا ہے۔

بین اقوامی تنظیم کا کہنا ہے کہ اس صورت حال میں انسانی بحران پیدا ہو گیا ہے۔ انٹرنشینل فیڈریشن آف ریڈ کراس کے ایک سینئر افسر کا کہنا ہے کہ بمباری نے تقریبًا سات لاکھ کے قریب لبنانیوں کو بے گھر کر دیا ہے اور متاثرہ افراد کو امدادی اشیاء پہنچانے کے لیئے جنگ بندی ضروری ہے۔

ان کا کہنا تھا کہ کم از کم انسانی بحران سے نکلنے کے لیئے ہی حملےروک دیے جائیں کیونکہ میزائلوں اور راکٹوں کے سائے میں امداد کی فراہمی ایک انتہائی مشکل کام ہے۔

	علاقے سے غیر ملکی پڑوسی ملکوں میں پناہ کے لیے جا رہے ہیں

ایسے ہی ایک علاقے میں ٹیکسی چلانے والے محمد نصولی کا کہنا تھا کہ
’بیروت میں ہم لوگ اپنے کام کر رہے ہیں۔ بیروت کے تمام نہیں التبہ کچھ خاص علاقے ہیں جو اسرائیلی بمباری کا نشانہ ہیں۔ اسرائیلی صرف ان علاقوں پر حملے کر ہے ہیں جہاں ان کے خیال میں حزب اللہ کے اراکین موجود ہیں‘۔

ان کا کہنا تھا کہ’ ہم یہاں محفوظ ہیں تاہم جہازوں اور دھماکوں کی آوازیں
آرہی ہیں اور یہ سب ہی بہت خوف زدہ کر دینے والا ہے۔ محمد نصولی کے بیشتر گاہک وہ غیر ملکی ہیں جو علاقے چھوڑ کر جار ہے ہیں۔