اسرائیلی نے حال ہی میں ایک فضائی حملے میں حماس کے رہنما کو ہلاک کر دیا تھا

کارپورل گیلد شیلٹ کو اتوار کی صبح فلسطینی شدت پسندوں نے غزہ کی پٹی پر ایک چھاپہ مار حملے میں اغوا کر لیا تھا۔

اتوار کی صبح غزہ کی پٹی میں اسرائیلی فوجی چوکی پر حملہ کے نتیجے میں کم از کم چار افراد ہلاک ہوئے جن میں دو اسرائیلی فوجی اور دو فلسطینی شامل ہیں۔

حماس کا کہنا ہے کہ اسے لاپتہ فوجی کے بارے میں کوئی علم نہیں ہے تاہم اس نے اغوا کرنے والے کسی بھی گروہ سے اپیل کہ اگر ان کے پاس یہ فوجی ہے تو اسے زندہ رکھیں اور اچھی طرح سے اس کی دیکھ بھال کریں۔

اسرائیل نے کہا ہے کہ وہ فوجی کو واپس لانے کے لیئے جو بھی اس سے بن پڑا کرے گا۔

اسرائیلی فوج کے سربراہ نے کہا ہے کہ اس معاملے میں حماس پوری طرح شامل ہے۔ انہوں نے کہا کہ فوجی زندہ ہے اور اس لیئے اس کی ذمہ داری ان پر عائد ہوتی ہے۔

اسرائیل کے مطابق یہ حملہ کریم شالوم کراسنگ کے نزدیک کیا گیا۔ حکام کے مطابق حملہ تین سو فٹ لمبی ایک سرنگ کھود کر کیا گیا۔

اسرائیلی ترجمان کےمطابق اس حملے میں دو اسرائیلی فوجی زخمی بھی ہوئے ہیں۔

	اغوا کیئے جانے والے فوجی کی تصویر

غزہ کی پاپولر ریزیسٹنس کمیٹی کے ایک ترجمان نے کہا ہے کہ یہ حملہ ان کے رہنما کی گزشتہ ماہ اسرائیلی حملے میں ہلاکت کے بدلے کے طور پر کیا گیا ہے۔ کمیٹی کا کہنا ہے کہ حملہ حماس کے ملٹری ونگ کے ساتھ مل کر کیا گیا ہے۔

فلسطینی شدت پسند گروہ حماس کے مسلح بازو کا کہنا ہے کہ اس کے حامیوں نے آتشگیر مادے اور بموں سے حملہ کیا ہے۔

اسرائیلی فوج کے مطابق حملہ اینٹی ٹینک میزائیل سے کیا گیا جس کے بعد فائرنگ کا تبادلہ شروع ہوگیا۔

غزہ میں بی بی سی کے نامہ نگار ایلن جونسٹن کا کہنا ہے کہ گزشتہ موسم گرما میں علاقے سے اسرائیلی فوج کے انخلاء کے کے بعد یہ اپنی نوعیت کا سب سے بڑا آپریشن ہے۔

یہ بھی کہا جا رہا ہے کہ یہ کارروائی حال ہی میں غزہ کے ساحل پر فلسطینی خاندان کی ہلاکت کا جواب ہے۔

حماس کے ترجمان کا کہنا ہے کہ انہوں نے ایک اسرائیلی ٹینک بھی تباہ کیا ہے تاہم اسرائیل نے اس کی تصدیق نہیں کی ہے۔

نامہ نگار نے کہا ہے کہ اب فلسطینی ہمیشہ کی طرح اسرائیل کی انتقامی کارروائی کے خوف میں رہیں گے۔