عائشہ تنظیم بی بی سی، نیویارک

	غلامی سے متعلق اس مقدمے کی امریکہ میں سیاسی اہمیت ہے

یہ مقدمہ سیاسی اہمیت کا ہے کیوں کہ امریکہ میں غلامی کا قانونی طور پر خاتمہ کردیا گیا ہے۔ بھارت سے بلائے گئے ان باون ملازمین کو ریاست اوکلاہوما کے شہر ٹلسا میں نہایت غیرانسانی حالات میں رکھا جاتا تھا۔

تیل کے کارخانوں کا ساز و سامان بنانے والی ’جان پکل‘ کمپنی نے ان ملازمین پر چھٹی کے اوقات میں بھی فیکٹری کی حدود سے باہر جانے پر پابندی لگا رکھی تھی۔ انہیں ایک ہی بڑے کمرے میں بستر دے رکھے تھے اور جج کلیئر ایگن کے مطابق ان کے کھانے پینے اور رہنے کا انتظام فیکٹری کے امریکی ملازمین سے الگ کیا گیا تھا۔

اس کے علاوہ مینیجمنٹ کا سلوک ان کے ساتھ نہایت ناروا تھا۔ان سے اکثر بدتمیزی سے بات کی جاتی تھی اور ان کے ملک اور ثقافت کے متعلق نامناسب زبان استعمال کی جاتی تھی۔ ان کی روزانہ کی تنخواہ تین ڈالر سے بھی کم تھی۔

چار سال پہلے یہ بھارتی ملازمین فیکٹری چھوڑ کر چلے گئے اور کمپنی کے خلاف ہرجانے کا مقدمہ دائر کر دیا۔ علاقے کے ایک پینٹیکوسٹل چرچ کے ارکان نے ان کی مدد کی۔

مقدمہ دائر ہونے کے کچھ ہی عرصے بعد جان پکل کمپنی بند ہوگئی۔ کمپنی نے مقدمہ دائر ہونے سے اب تک ان الزامات کی تردید کی ہے۔

بھارتی ملازمین کے وکلاء نے جج سے کمپنی کے خلاف پچاس لاکھ سے زائد ہرجانے کی درخواست کی تھی۔ وکیل کین فیلٹی کا کہنا تھا کہ وہ اس فیصلے سے پوری طرح خوش نہیں۔ اس کے باوجود اس طرح کے کسی مقدمے میں یہ پہلا فیصلہ ہے جس میں دس لاکھ ڈالر سے زائد رقم ادا کی جائے گی۔

کین فیلٹی کے مطابق یہ ’بات پیسے کی نہیں بلکہ یہ ہے کہ دوبارہ کسی کے ساتھ اس طرح کا سلوک نہ ہو۔‘

بارہ لاکھ ڈالر کی اس رقم کو جب برابر ان بھارتی ملازمین میں تقسیم کیا جائے گا تو ہر ایک کے حصے میں صرف بیس ہزار ڈالر کے قریب آئیں گے۔ یہ لوگ اب امریکہ ہی کی مختلف ریاستوں میں کام کر رہے ہیں۔