دونوں وزرائے خارجہ کا یہ عراق کا ایک اچانک دورہ ہے

عراقی انتخابات تشدد کے سائے میں

عراقی میں انتقالِ اقتدار: خصوصی ضمیمہ

دونوں مغربی راہنماؤں کے خیال میں اصل مسئلہ وزارت عظمی کے امیدوار پر موجود اختلاف ہے۔ اگرچہ دسمبر کے انتخابات کے بعد سے ابراہیم جعفری اس عہدے پر فائز ہیں مگر ان کے لیے مشکلات میں مسلسل اضافہ ہو رہا ہے۔ کردوں اور سنیوں کی جانب سے تو ان کی مخالفت تھی ہی اب خود ان کے اپنے شیعہ حامیوں کی جانب سے بھی مخالفت شروع ہوگئی ہے۔ اس کے علاوہ امریکہ بھی اب ان کے بارے میں شاکی نظر آتا ہے۔

وزیرِ خارجہ جیک سٹرا کہتے ہیں: ’وزیرخارجہ رائس اور میں نے جس بات پر زور دیا ہے اس میں پہلی بات تو یہ ہے کہ عراق ایک خودمختار ملک ہے۔ اور یہ فیصلہ انہیں کرنا ہے کہ وزیراعظم سمیت ان کے قائدین کون ہوں گے۔ مگر عالمی برادری، بالخصوص امریکی اور برطانیہ کو اس بات میں گہری دلچسپی ہے کہ عراقی وزارت عظمی کے منصب پر کب کسی کو فائز کرتے ہیں۔ کیونکہ طاقت کا خلا عراقیوں کوں نقصان پہنچا رہا ہے‘۔

امریکی وزیرخارجہ کونڈو لیزا رائس کا بھی یہ ہی کہنا ہے کہ ان کا ملک اس معاملے میں عراقیوں پر اپنی مرضی مسلط نہیں کرے گا۔ تاہم جلدی اس بات کی ہے کہ کوئی ایسی سیاسی شخصیت سامنے آئے جو قومی اتحاد کی حکومت بنا سکے۔ اور مسٹر جعفری اب تک ایسا کرنے میں ناکام رہے ہیں۔ اس عجلت کا اظہار برطانوی وزیرخارجہ جیک سٹرا نے بھی کیا۔ ان کا کہنا تھا کہ کسی کو وزیراعظم بننا ہے اور جلد ہی بننا ہے۔

	رائس اور سٹرا نے صدر جلال ظالبانی سے بھی ملاقات کی

صدر جلال طالبانی کے ترجمان ہیوا عثمان کہتے ہیں: ’یہ اپیل صرف جیک سٹرا نے نہیں کی بلکہ عراق کے اندر بھی یہ دباؤ بڑھتا جا رہا ہے۔ امن و امان کی صورتحال اچھی نہیں ہے اور عراقی گلی کوچوں میں اس دباؤ کو محسوس کرتے ہیں کہ حکومت کا جلد قیام کتنا ضروری ہے۔ میرے خیال میں مذاکرات آگے بڑھ رہے ہیں۔ یہ الگ بات ہے کہ اس عمل کی رفتار اتنی تیز نہیں۔ کئی باتیں ایسی ہیں جن پر پہلی بار آج ہی بات ہوئی۔ اب ان مسائل کو مذاکرات کی میز پر رکھا جائے گا اور ان بحث ہوگی۔ لیکن تمام قائدین صبح شام اس کوشش میں ہیں کہ یہ مسائل جلد سے جلد حل ہوجائیں‘۔

بغداد میں بی بی سی کے ایک نامہ نگار کا کہنا ہے کہ برطانوی اور امریکی وزرائے خارجہ نے عراقی قیادت کو بالکل واضح پیغام دیا ہے کہ حکومت سازی کے معاملے میں امریکہ اور برطانیہ کے صبر کا پیمانہ اب لبریز ہوتا جا رہا ہے۔

دونوں وزرائے خارجہ کے دورے کے دوران بھی عراق میں تشدد میں کوئی کمی نہیں آئی۔

مزاحمت کاروں نے بغداد کے شمال مشرق میں بعقوبہ کے نزدیک ایک گاؤں قبا میں ایک شیعہ مسجد کو اڑا دیا۔ بغداد شہر سے چار لاشیں ملیں اور امریکی فوج کے مطابق بلد شہر کے قریب امریکی اور عراقی فوج کے ساتھ ایک جھڑپ میں چار مزاحمت کار ہلاک ہو گئے۔