پینٹاگون کے مطابق 1500 فوجی اس آپریشن میں حصہ لے رہے ہیں

جمعرات کے روز شروع کیے جانے والے اس فوجی آپریشن میں پچاس سے زائد لڑاکا طیارے اور پندرہ سو عراقی اور امریکی فوجی حصہ لے رہے ہیں۔

امریکی فوج نے بتایا ہے کہ پہلے دن کے اختتام پر چالیس مشتبہ افراد کو حراست میں لیا گیا ہے اور خاصی تعداد میں ہتھیار برآمد کیے گئے ہیں۔ اس کے علاوہ فوجی وردیاں بھی برآمد کی گئی ہیں۔

سن دوہزار تین میں عراق پر امریکی حملوں کے بعد سے یہ سب سے بڑا فضائی آپریشن بتایا گیا ہے۔ عراقی وزیر خارجہ ہوشیار زیباری نے بتایا ہے کہ اس آپریشن کا مقصد مزاحمت کاروں کو اس شہر کو شدت پسندی کے گڑھ میں تبدیل کرنے سے روکنا ہے۔

سامرہ میں کیے جانے والے اس فوجی آپریشن کے بارے میں اطلاعات کی تصدیق غیرجانبدار ذرائع سے نہیں ہورہی ہے۔ امریکی فوج نے بتایا ہے کہ ہیلی کاپٹروں کے ذریعے عراقی فوجیوں کو صوبہ صلاح الدین میں اتارا جارہا ہے جہاں پینٹاگون کے مطابق اکتالیس افراد حراست میں لیے گئے ہیں۔

امریکی فوج نے کہا ہے کہ لڑاکا طیاروں سے کوئی میزائیل نہیں داغے گئے ہیں اور نہ ہی بم گرائے گئے ہیں۔ لیکن ان اطلاعات کی غیرجانبدار ذرائع سے تصدیق نہیں کی جاسکتی ہے۔ یہ بھی واضح نہیں ہے کہ امریکی فوج کو اس آپریشن کے دوران کسی مزاحمت کا سامنا ہے یا نہیں۔

گزشتہ ماہ بغداد کے شمال میں سو کلومیٹر کی دوری پر واقع تاریخی روضہ عسکری پر بم حملے کے بعد اس علاقے میں بڑے پیمانے پر فرقہ وارانہ تشدد کے واقعات پیش آئے ہیں۔ حالیہ دنوں میں اس خدشے کا اظہار کیا جاتا رہا ہے کہ عراق خانہ جنگی کا شکار ہوسکتا ہے۔

واشنگٹن سے بی بی سی کے صحافی ایڈم بروک کا کہنا ہے کہ طاقت کے اس بڑے مظاہرے کے پیچھے یہ توقع ہے کہ اس کے ذریعے تشدد کے مسلسل جاری ان واقعات کو روکنے میں مدد ملے گی جو خانہ جنگی کی شکل اختیار کر سکتے ہیں۔

عراقی وزیر خارجہ زیباری نے بی بی سی کو بتایا کہ ’جب بھی مزاحمت کار یا دہشت گرد پاؤں جمانے کی کوشش کریں گے، یا ملک کے کسی حصے میں محفوظ ٹھکانہ بنانے کی کوشش کریں گے، تو آپ اتحادی افواج کی حمایت سے عراقی فورسز کا ایسا ہی ردعمل دیکھیں گے۔‘

بغداد میں امریکی فوج کے ترجمان سرجنٹ سٹان لاویری نے بی بی سی کو بتایا: ’ہم مزاحمت کاروں اور دہشت گردوں تک ہتھیاروں کی فراہمی روکنے کی کوشش کررہے ہیں، اور جتنا ممکن ہو گرفتار ہوسکیں اور مارے جائیں۔‘

ہمارے نامہ نگار کا کہنا ہے کہ ال عسکری روضے پر حملے کے بعد سے سامرہ فرقہ وارانہ تشدد کا گڑھ بنتا جارہا تھا اور امریکہ یہ دکھانا چاہتا ہے کہ وہ فرقہ وارانہ تشدد کی جڑ کے خاتمے کے لیے سنجیدہ ہے۔