جماعت المجاہدین بنگلہ دیش کے رہنما عبدالرحمان حراست میں

امریکی امن کور یعنی یو ایس پیس کور کی ایک ترجمان نے بتایا کہ امدادی ادارے کے کل ستر رضاکار بنگلہ دیش چھوڑ کر جاچکے ہیں۔ بنگلہ دیش کی حکومت نے ادارے کے فیصلے کو ’غلط‘ مشورے کا نتیجہ بتایا ہے۔ منگل کے روز امریکہ نے بنگلہ دیش میں دہشت گردی مخالف اقدامات کی حمایت کا اظہار کیا۔

امریکی ادارے کا یہ فیصلہ ایسے وقت کیا گیا ہے جب بنگلہ دیش میں حالیہ دنوں میں ہونے والے متعدد بم دھماکوں کے لیے کئی شدت پسندوں کو گرفتار کیا گیا ہے۔

گزشتہ چند ہفتوں میں بنگلہ دیش کی سکیورٹی فورسز نے ممنوعہ تنظیم ’جماعت المجاہدین بنگلہ دیش‘ کے سات میں سے پانچ اعلیٰ رہنماؤں کو حراست میں لیا ہے۔ تنظیم کے سربراہ عبدالرحمان اور ان کے نائب صدیق الاسلام عرف بنگلہ بھائی کو حال ہیں میں گرفتار کیا گیا ہے۔

بنگلہ دیش کی حکومت کا کہنا ہے کہ اس تنظیم کی جانب سے کیے جانے والے بم دھماکوں میں گزشتہ اگست سے اب تک تیس جانیں ضائع ہوچکی ہیں۔

امریکی امن کور کی پریس ڈائریکٹر باربرہ ڈیلی نے بی بی سی کو بتایا کہ ادارے کے رضاکاروں کی سکیورٹی ان کی اولین ترجیحات میں سے ہے۔ ان کا کہنا تھا کہ یہ فیصلہ سکیورٹی سے متعلق موجودہ حالات کے مدنظر کیا گیا ہے۔

امریکی امن کور کی جانب سے ڈھاکہ میں جاری کیے جانے والے ایک بیان میں اہم شدت پسند رہنماؤں کی گرفتاری کی تعریف کی گئی ہے اور اسے انتہاپسندی اور دہشت گردی کے خلاف اہم پیش رفت بتایا گیا ہے۔

بیان میں مزید کہا گیا ہے کہ شدت پسندوں کی گرفتاری کی ’کامیابی سے امریکیوں یا دیگر غیرملکیوں پر جماعت المجاہدین بنگلہ دیش کے کارکنوں کی جانب سے جوابی کارروائیوں کے خدشات‘ موجود ہیں۔