رائس اپنے انڈونیشیائی ہم منصب کے ساتھ

وزیر خارجہ رائس نے اعتراف کیا کہ امریکہ کی خارجہ پالیسی ہمیشہ مقبول نہیں رہی لیکن انہوں نے کہا کہ وہ تمام مذاہب کی قدر کرتی ہیں۔ رائس نے دہشت گردی کے خلاف انڈونیشیا کی جانب سے ملنے والی مدد کی تعریف کی۔

امریکی وزیر خارجہ نے انڈونیشیا کے صدر بیم بینگ یودھویونو کے ساتھ ملاقات میں دونوں ملکوں کے فوجی روابط پھر سے شروع کرنے اور برڈ فلو کے مسئلے کے بارے میں بھی بات چیت کی۔

انڈونیشیا کے دارالحکومت جکارتہ میں رائس کے دو روزہ دورے کے خلاف سینکڑوں لوگوں نے مظاہرے کیے۔ امریکہ مخالف نعرے لگاتے ہوئے مظاہرین دارالحکومت میں امریکی سفارت خانے کے سامنے جمے رہے۔

ماہرین کا کہنا ہے کہ امریکہ دنیا کے سب سے مسلم ملک انڈونیشیا کے ساتھ اپنے تعلقات بہتر کرنے کا خواہاں ہے۔ جکارتہ میں اپنے انڈونیشیائی ہم منصب حسن ورایودا کے ساتھ بات کرتے ہوئے رائس نے کہا کہ جمہوری انڈونیشیا مسلم دنیا کے لیے ’مشعل راہ‘ ہے۔

وزیر خارجہ رائس نے کہا: ’میں سمجھتی ہوں کہ انڈونیشیا رواداری، اعتدال پسندی اور کثیرالمعاشرہ سماج کے مثال کے طور پر بہت بڑا کردار ادا کرسکتا ہے۔‘

انہوں نے بیرون ملک ہونے والی امریکہ کی تنقید میں نرمی لانے کی کوشش میں کہا کہ ’میرے خیال امریکہ کو دنیا میں بہت کچھ کرنا پڑا جو کہ بیشتر دنیا میں مقبول نہیں ہے۔‘ رائس نے مزید کہا: ’ہم ایک مشکل دشمن کے خلاف لڑرہے ہیں، ایک دشمن جسے یہاں انڈونیشیا میں، بالی میں، محسوس کیا گیا اور جکارتہ میں۔‘

انڈونیشیا کے وزیر خارجہ حسن ورایودا نے کچھ معاملات پر دونوں ملکوں کے اختلافات کا اعتراف کیا لیکن صوبہ آچے میں امن کی بحالی میں امریکی امداد کا شکریہ اداد کیا۔

انڈونیشیا کے صدر بیم بینگ یودھویونو کے ایک ترجمان نے بتایا کہ انہوں نے رائس کے ساتھ علاقے میں سکیورٹی کے معاملات، مشرق وسطیٰ میں تبدیلیاں اور مغرب اور اسلام کے درمیان تعلقات کے بارے میں بات چیت کی۔