صدر بشر الاسد اور سابق نائب صدر عبدالحلیم خدام کے ساتھ جو اب فرانس میں رہائش پذیر ہیں

یہ اقدم شامی پارلیمنٹ میں گزشتہ روز ارکانِ پارلیمنٹ کے اس مطالبے کے بعد کیا گیا ہے جس میں کہا گیا تھا کہ جلاوطن سابق نائب صدر عبدالحلیم پر بغاوت کا مقدمہ چلایا جائے۔

یہ مطالبہ ان کے اس بیان کے بعد کیا گیا تھا جس میں انہوں نے انکشاف کیا تھا کہ شام کے صدر بشر الاسد نے رفیق حریری کو گزشتہ سال فروری میں سنگین نتائج کی دھمکیاں دی تھیں۔

مقتول لبنانی وزیراعظم رفیق حریری ایک بم دھماکے میں ہلاک ہو گئے تھے اور ان کی ہلاکت کی اقوام متحدہ نے تفتیش کی تھی جس میں اس شک کا اظہار کیا گیا تھا کہ رفیق حریری کے قتل میں شام کی خفیہ ایجنسی کے اہلکار اور ان کے لبنانی ہم منصبوں کے ملوث ہونے کی شہادتیں ہیں۔

شام نے اس الزام کی مسلسل تردید کی ہے اور اس کے ساتھ یہ بھی کہا ہے کہ اگر اس کا کوئی اہلکار رفیق حریری کے قتل میں ملوث پایا گیا تو وہ سزا سے بچ نہیں سکے گا۔

شام کے سابق نائب صدر خدام نے العریبہ ٹیلی ویژن کو دیے گئے ایک انٹرویو میں کہا تھا کہ ’حریری کو کئی دھمکیاں ملیں‘۔

انہوں نے ٹیلی ویژن کو بتایا: ’اسد نے مجھے بتایا کہ انہوں نے حریری کو کافی سخت الفاظ کہے ہیں اور کچھ اس طرح کی بات کہ ’ جس نے ہماری( شام) کی بات نہ مانی اس کو کچل دیا جائے گا‘۔

سابق وزیراعظم رفیق حریری پر لبنان کی سیاست میں شام کے موقف کی حمایت کے لیے کافی دباؤ تھا۔

اقوام متحدہ کے تفتیش کار ڈیتلیو مہلس کا کہنا ہے کہ کئی ذرائع نے بتایا کہ رفیق حریری نے انہیں بتایا تھا کہ صدر بشر الاسد نے دھمکی دی تھی کہ اگر انہوں نے لبنانی صدر امیل لاہود کے اقتدار میں توسیع کی حمایت نہیں کی تو وہ ’لبنان کو (ان کے) سر پر توڑ دیں گے‘ ۔

عبدالحلیم خدام نے، جن کی عمر تہتر سال ہے، گزشتہ جون میں شام کے نائب صدر کی حیثیت سے استعفیٰ دیدیا تھا۔ انہوں نے العربیہ ٹیلی ویژن کو بتایا کہ وہ بشر الاسد سے باضابطہ طور پر تمام تعلقات ختم کررہے ہیں۔