برطانوی انٹیلیجنس ایم آئی سِکس کا دفتر

ان الزامات کے بعد یونان میں سرکاری وکیلوں نے الزامات کی تحقیقات کا مطالبہ کیا ہے۔

وکیلِ سرکار فرانگیسکوس راگوسس نے ان الزامات کی تفصیل بتاتے ہوئے کہا ہے کہ ’مجھے لگتا ہے کہ اس خفیہ آپریشن میں یونانی حکام نے برطانوی خفیہ کے ایجنٹوں کی مدد کی ہے تا کہ وہ یہ جان سکیں کہ ان کا لندن میں رہنے والوں کی دشتگردانہ سرگرمیوں سے کوئی تعلق ہے یا نہیں‘۔

ان سات پاکستانیوں نے کہا ہے کہ انہیں سات جولائی کو لندن کی زیرزمین ریلوے میں ہونے والے خودکش دھماکوں کے فوری بعد اغوا کرلیا گیا تھا۔

راگوسس نے مبینہ مغویوں سے کیے جانے والے سلوک کے بارے میں بتایا کہ ’انہوں نے بتایا ہے کہ انہیں نفسیاتی تشدد کا نشانہ بنایا گیا۔ کسی نے یہ نہیں کہا کہ اسے مارا پیٹا گیا یا ان پر کسی اور طرح کا دباؤ ڈالا گیا۔ الزامات یہ ہیں کہ انہیں زبردستی لے جایا گیا، ان کی آنکھوں پر پٹیاں باندھی گئیں اور اسہ عالمی طور پر تشدد تصور کیا جاتا ہے۔ ان پر کوئی الزام بھی نہیں تھا۔ سب سے زیادہ تکلیف دہ بات یہ تھی کہ انہیں یہ بھی پتا نہیں تھا کہ ان کے ساتھ کیا کیا جانے والا ہے۔ انہیں تنہائی میں رکھا گیا اور اس دوران انہیں کسی بھی جاننے والے کو فون کرنے کی اجازت نہیں دی گئی۔ انہیں کسی وکیل سے بھی رابطہ نہیں کرنے دیا گیا۔ اس کہ بعد انکھوں پر پٹیاں باندھ کر وسطی ایتھن کے علاقے اومونیا میں چھوڑ دیا گیا اور یہ کہا گیا کہ وہ اس واقعے کے بارے میں کسی کو کچھ نہ بتائیں اور اگر انہوں نے کسی کو کچھ بتایا تو ان کے ساتھ بہت برا ہو گا‘۔

راگوسس کا کہنا ہے کہ ان پاکستانیوں سے پوچھا گیا کہ برطانیہ ان کے کون کون سے رشتے دار ہیں، وہ کہاں رہتے ہیں، کیا کرتے ہیں، ان کے موبائل ٹیلیفونوں کے نمبر کیا کیا کیا اور آخری بات انہوں نے ان کب اور کیا بات کی۔

مغویوں کا کہنا ہے کہ اغواکارانگریزی بول رہے تھے اور انہوں نے انہیں آنکھوں پر پٹیاں باندھ کر اڑتالیس گھنٹے تک غیرقانونی طور پر قید رکھا۔

برطانیہ کے وزیر خارجہ جیک اسٹرا نے ان الزامات کے تردید کی ہے کہ ان سات پاکستانیوں کے اغوا میں برطانوی انٹیلیجنس کے ایجنٹ ملوث تھے۔ برطانیہ کی ایک پارلیمانی کمیٹی کو جیک اسٹرا نے بتایا کہ یونان میں ہونے والے اس واقعے میں کوئی بھی برطانوی اہلکار شامل نہیں تھا۔

یونان کی پولیس کا کہنا ہے کہ جولائی کے اس واقعے کے لیے ان کے پاس مقدمہ اب دائر کیا گیا ہے۔ مبینہ طور پر یہ واقعہ جولائی میں پیش آیا تھا۔ پاکستانیوں کی نمائندگی کرنے والے وکیل کا کہنا ہے کہ اب جبکہ اس بارے میں پارلیمان میں پیٹیشن دائر کردیا گیا ہے تو انصاف اور پبلِک آرڈر کے وزراء آئندہ چند دنوں میں ان سوالات کا جواب دینے کے لیے مجبور ہوں گے۔