میشال دمشق سے حماس کی رہنمائی کرتے ہیں

خالد میشال نے شام کے دارالحکومت دمشق میں ایک ریلی سے خطاب کرتے ہوئے بتایا کہ ان کی تنظیم لڑائی کے ایک نئے مرحلے کی تیاری کر رہی ہے۔

حالیہ جنگ بندی فروری میں شروع ہوئی جس کا آغاز اسرائیل کی جانب سے فلسطینیوں پر حملوں کی بندش اور فلسطینی قیدیوں کی رہائی سے ہوا۔

حماس نے نومبر میں اس کے ایک رہنما کے اسرائیل کے ہاتھوں قتل کے بعد بھی کہا تھا کہ وہ جنگ بندی پر قائم نہیں رہے گی۔

دمشق کے قریب یرمک کے ایک پناہ گزین کیمپ میں خطاب کرتے ہوئے خالد میشال نے کہا کہ اب امن کی کوئی گنجائش نہیں ہے۔

انہوں نے کہا کہ’میں اپنے فلسطینی بھائیوں سے کہتا ہوں کہ ہم سیاسی جمود کا شکار ہو گئے ہیں‘۔

انہوں نے مزید کہا کہ ’میں یہ با آواز بلند کہہ رہا ہوں کہ ہم جنگ بندی کا نیا معاہدہ نہیں کریں گے اور ہمارے لوگ لڑائی کی تیاری کر رہے ہیں‘۔

مارچ 2004 میں حماس کے رہنما شیخ احمد یٰسین کی ہلاکت کے بعد میشال کو حماس کا رہنما مقرر کیا گیا تھا۔

نامہ نگاروں کا کہنا ہے کہ خالد میشال کے قریبی حامی نسبتاً زیادہ سخت گیر موقف رکھتے ہیں۔