سی آئی اے کی خفیہ جیلوں کا سوال امریکی وزیرِ خارجہ کے دورۂ رومانیہ کے دوران بھی سامنے آئے گا

ملاقات کے بعد جرمن چانسلر کا کہنا تھا کہ جرمنی اور امریکہ قریبی دوست ہیں تاہم انہوں نے سی آئی اے کی جانب سے جرمنی کے راستے دہشتگردوں کی منتقلی کے معاملے پر تشویش کا اظہار بھی کیا۔

جرمنی کا کہنا ہے کہ اس کے پاس جرمن سر زمین پر اترنے والی چار سو پروازوں کا ریکارڈ موجود ہے اور وہ امریکہ سے اس سلسلے میں وضاحت چاہتا ہے۔

یہ بھی کہا جا رہا ہے کہ جرمن حکام کو ان تمام سرگرمیوں کا علم تھا۔ ذرائع ابلاغ کا کہنا ہے کہ سابق جرمن وزیرِ داخلہ اوٹو شلی کو امریکی حکام کی جانب سے بتایا گیا تھا کہ ایک جرمن شہری کو مقدونیہ سے گرفتار کر کے افغانستان کی جیل میں لے جایا گیا جہاں اسے پانچ مہینے تک قید رکھا گیا۔

اوٹو شلی نے اس اطلاع پر تبصرے سے انکار کر دیا ہے اور جرمن وزارتِ داخلہ کا کہنا ہے کہ وہ اس معاملے کی چھان بین کر رہے ہیں۔

برلن سے بی بی سی کے نمائندے رے فرلونگ کا کہنا تھا کہ جرمنی کی نئی چانسلر برسرِ اقتدار آنے کے بعد امریکہ سے بہتر تعلقات کی خواہاں تھیں لیکن خدشہ ہے کہ اس معاملے سے امریکہ اور جرمنی کے تعلقات ایک بار پھر سردمہری کا شکار ہو سکتے ہیں۔

	جرمن حکام کے پاس 400 مشتبہ پروازوں کا ریکارڈ موجود ہے

جرمن چانسلر سے ملاقات کے لیے روانہ ہونےسے قبل کونڈالیزا رائس نے کہا تھا کہ امریکہ مشتبہ افراد پر تشدد کرنے والوں کو معافی نہیں دے گا۔ انہوں نے اس بات کو تسلیم کیا کہ مشتبہ دہشتگردوں کو امریکہ لایا گیا تھا مگر انہوں نے ان افراد پر تشدد کی تردید کی۔

انہوں نے کہا تھا کہ ان افراد کو ’سپردگی‘ کے عمل کے تحت منتقل کیا گیا جو ایک ’قانونی ہتھیار‘ ہے۔ تاہم انہوں نے اس بات پر تبصرہ کرنے سے انکار کیا کہ سی آئی اے خفیہ جیلیں چلاتی ہے جہاں ان مشتبہ افراد سے تفتیش کی جاتی ہے۔

سی آئی اے کی خفیہ جیلوں کا سوال امریکی وزیرِ خارجہ کے دورۂ رومانیہ کے دوران بھی سامنے آئے گا کیونکہ حقوقِ انسانی کی تنظیموں کا دعوٰی ہے کہ رومانیہ میں امریکی تحقیقاتی ایجنسی کی جیلیں موجود ہیں۔