جرمنی میں بھی سی آئی اے کے طیارے اترنے کی اطلاعات ہیں

انہوں نے کہا کہ ان افراد کی حوالگی اور منتقلی سے لوگوں کی جانیں بچی ہیں۔

مس رائس نے کہا کہ امریکہ اپنے اتحادیوں کے ساتھ عشروں سے قیدیوں کی سپردگی کا عمل جاری رکھے ہوئے ہے۔ انہوں نے کہا کہ’ سپردگی کے عمل سے دہشت گرد قابلِ اثر نہیں رہتے اور جانیں بچ جاتی ہیں اور یہ منتقلیاں بین الاقومی قانون کے تحت جائز ہیں‘۔

کونڈالیزا رائس کا کہنا تھا کہ امریکہ دہشتگردوں کو شکست دینے کے لیے ہر قانونی ہتھیار استعمال کرے گا۔تاہم انہوں نے اس سوال کا بلاواسطہ جواب نہیں دیا کہ کیا سی آئی اے امریکہ سے باہر جیلیں چلاتی ہے۔

ان کا کہنا تھا کہ’ ہم اپنے خفیہ ذرائع، قانون نافذ کرنے والے ادارے اور فوجی آپریشن کے بارے میں معلومات فراہم نہیں کر سکتے اور ہمیں امید ہے کہ دیگر اقوام بھی یہی نظریہ رکھیں گی‘۔

واشنگٹن میں بی بی سی کے نمائندے کلائیو مائرز کا کہنا ہے کہ کونڈالیزا رائس نے امریکی پالیسی کا زوردار طریقے سے دفاع کیا ہے اور وہ اپنے دورہ یورپ کے دوران یورپی ممالک پر زور دیں گی کہ وہ امریکہ سے تعاون کریں نہ کہ تنقید ۔