برڈ فلو کے خدشے سے ایک ہی دن میں ساٹھ لاکھ مرغیاں مار دی گئیں

یہ تمام مرغیاں ریاست کے ہیشان کاؤنٹی میں تین کلومیٹر کے علاقے میں ماری گئیں اور اس آپریشن میں ایک سو پولیس والے اور سترہ سو حکومتی اہلکاروں نے مدد کی۔ علاقے کے لوگوں کو مفت طبی جانچ کی سہولت فراہم کی جارہی ہے۔

مرغیوں یا دیگر پرندوں کے ذریعے انسانوں میں پھیلنے والی جان لیوا بیماری سے، جسے عام طور پر برڈ فلو کہا جاتا ہے، دنیا کے کئی ممالک نمٹنے کی کوشش میں ہیں۔ پیر کے روز اس بیماری کے بارے میں غور کرنے کے لئے جنیوا میں ایک بین الاقوامی اجلاس منعقد ہورہا ہے۔

حال میں چین میں برڈ فلو کے چار واقعات پیش آئے تھے لیکن یہ نہیں معلوم ہوا کہ ان میں اس بیماری کے انسانوں میں پھیلنے کا بھی کوئی واقعہ ہو۔ لیکن چین کا کہنا ہے کہ وہ یہ بات حتمی طور پر نہیں کہہ سکتا ہے کہ حال میں ایک لڑکی کی ہلاکت اس بیماری سے نہ ہوئی ہو۔

چین کی حکومت نے صحت سے متعلق اقوام متحدہ کے ادارے ورلڈ ہیلتھ آرگنائزیشن کے ماہرین سے مدد طلب کی ہے کہ وہ اس بات کا پتہ لگائیں کہ گزشتہ ماہ ریاست ہونان میں ایک بارہ ماہ کی لڑکی کی موت کہیں برڈ فلو کی وجہ سے تو نہیں ہوئی۔

برڈ فلو کے وائرس کی وجہ سے ایشیائی ممالک میں کل ساٹھ افراد ہلاک ہوچکے ہیں۔ اس بات کا خدشہ ہے کہ مرغیوں اور دیگر چڑیوں سے انسانوں میں پھیلنے والی بیماری اگر انسانوں سے انسانوں میں پھیلنے لگے تو وبا کی شکل اختیار کرلے گی۔