حفاظتی دستے مئی 2003 کے بم دھماکوں کے بعد سے شدت پسندوں کے خلاف مہم چلا رہے ہیں

اتوار کو شروع ہونے والے محاصرے میں اب تک مرنے والے شدت پسندوں کی تعداد پانچ ہو گئی ہے جبکہ اطلاعات کے مطابق گزشتہ دو روز میں فائرنگ کے تبادلے میں ایک پولیس اہلکار بھی ہلاک ہو گیا تھا۔

پولیس اور سکیورٹی فورسز دمام کی ایک مصروف گلی میں ایک عمارت کا بدستور محاصرہ کیے ہوئے ہیں جس میں شدت پسندوں نے پناہ لے رکھی ہے۔

دریں اثناء امریکی حکومت نے دہران میں اپنا قونصل خانہ عارضی طور پر بند کرنے کا فیصلہ کیا ہے۔

قونصل خانے کے حکام کا کہنا ہے کہ یہ فیصلہ دمام میں جاری مسلح جھڑپ کی وجہ سے کیا گیا ہے۔

گزشتہ روز سکیورٹی فورسز نے تین شدت پسندوں کو ہلاک کرنے کا دعویٰ کیا تھا جو ان کے بقول القاعدہ تنظیم سے تعلق رکھتے تھے۔

عینی شاہدوں نے شدید لڑائی ہونے کی اطلاع دی ہے۔ عمارت کے اندر محصور شدت پسندوں کے بارے میں متضاد اطلاعات موصول ہوئی ہیں۔

اس سے قبل عینی شاہدین نے اطلاع دی تھی کے دمام کے ایک مصروف کاروباری علاقے میں جب فوج اور پولیس نے ایک عمارت کا محاصرہ کیا تو دونوں طرف سے فائرنگ کا تبادلہ شروع ہو گیا۔

دمام سعودی عرب کے مشرق کا وہ علاقہ ہے جہاں تیل کے ذخائر بالکثرت ہیں۔

اس سے پہلے بھی سعودی عرب متعدد افراد شدت پسندوں اور سکیورٹی فورسز کے درمیان جھڑپوں میں ہلاک ہو چکے ہیں۔

سعودی سکیورٹی اہلکاروں اور مبینہ شدت پسندوں کے درمیان اپریل میں بھی اس سال ایک جھڑپ ہوئی تھی جو دو دن جاری رہی تھی اور اس میں سات مبینہ شدت پسند ہلاک ہوئے تھے جب کہ چالیس کے قریب سکیورٹی اہلکار زخمی ہو گئے تھے۔

واضح رہے کہ سعودی حکومتی حلقے کہتے ہیں کہ مبینہ اسلامی شدت پسند برسرِ اقتدار سعودی خاندان کا تختہ الٹنے اور تمام غیر ملکیوں کو سعودی عرب سے نکالنا چاہتے ہیں۔