اصلاح پسندوں نےانتخابات کے بائیکاٹ کی اپیل کی ہے

ایران کی مجلسِ بُزرگان نے ایک ہزار سے زائد امیدواروں کی نامزدگی کو نا منظور کر دیا ہے۔

جن لوگوں کو نا اہل قرار دیا گیا ہے انِ میں تعلیم کے سابق وزیر مُصطفی مُعین بھی شامل ہیں۔

اصلاح پسندوں نے اس اقدام کو ’غیر قانونی ‘قرار دیتے ہوئے 17 جون کے انتخابات کے بائیکاٹ کی اپیل کی ہے۔

گزشتہ برس بھی پارلیمانی انتخابات اس وقت تنازعہ کا شکار ہو گئے تھے جب اسی مجلسِ بُزرگان نے ڈھائی ہزار اصلاح پسند امیدواروں کو نا اہل قرار دیا تھا۔

اسلامک ایران پارٹیسپیشن فرنٹ کے امیدوار مسٹر معین نے خبر رساں ایجنسی اے ایف پی سے بات کرتے ہوئے کہا ہے کہ یہ اقدام غیر مناسب ، غیر قانونی اور غیر منصفانہ ہے۔

پارٹی کے سینئیر رکن مصطفی تاج زادہ نے کہا ان انتخابات کا بائیکاٹ کیا جانا چاہئے۔

اصلاح پسندوں کے سابق نائب صدر علی ابتاہی کا کہنا تھا کہ ان امیدواروں کو نا اہل قرار دیا جانا یہ ظاہر کرتا ہے کہ ملک میں کسی ایک نظریہ کی حکومت بنانے کی سازش کی جا رہی ہے۔

جن لوگوں کی نامزدگی منظور کی گئی ہے ان میں سابق صدر اکبر ہاشمی رفسنجانی ، چار قدامت پسند اور ایک اصلاح پسند شامل ہے۔

ان چار قدامت پسندوں میں ایک سابق پولیس چیف ، ریولیوشنری گارڈز کے سابق کمانڈر ، تہران کے میئر اور سرکاری ریڈیو اور ٹی وی کے سابق سربراہ ہیں۔

ایرانی پارلیمنٹ کے سابق سپیکر مہدی کروبی بھی اس فہرست میں شامل ہیں لیکن نامہ نگاروں کا کہنا ہے کہ وہ صدر کے عہدے کے لئے اصلاح پسندوں کے اصل امیدوار نہیں ہیں۔

مسٹر کروبی کی انتخابی مہم کے سربراہ علی اکبر نے بھی مسٹر معین کو نا اہل قرار دیے جانےکو ایک غیر قانونی قدم قرار دیا ہے۔