مسٹر رفسنجانی نے انتخابات میں شمولیت کا اعلان کچھ ہچکچانے کے بعد کیا۔

صدارتی امیدواروں جمعہ تک اپنے کاغزات نامزدگی یعنی ناموں کا رجسٹریشن کراسکتے ہیں۔

امیدواروں کے اندراج میں غیر معروف امیداروں نے پہل کی جن میں کچھ خواتین بھی شامل ہیں۔ یاد رہے کہ خواتین کو ایرانی قانون کے تحت انتخابات میں حصّہ لینے کی اجازت نہیں ہے۔

ان امیدواروں میں ایک اکیس سالہ خاتون، اسامہ بن لادن جیسا لباس پہنے والا ایک شخص اور شاہ ایران کے دور حکومت کے ایک سابقہ سفارت کار بھی شامل ہیں۔

شورٰی نگہباں تمام امیدواروں کی منظوری دیتی ہے

ان تمام امیدواروں کی منظوری ایران کی شوریٰ نگہباں دے گی۔ یہ شوریٰ شدت پسند رہنماؤں کی ایک ایسی مضبوط بااثر کونسل ہے جو صدارتی امیدواروں کی اہلیت ان کے کردار کی مضبوطی ایران کی اسلامی اقدار کے حوالے سے جانچے گی۔

پہلے دو مرتبہ ملک کےصدر رہ چکنے والے مسٹر رفسنجانی نے ان انتخابات میں شمولیت کا اعلان کچھ ہچکچانے کے بعد کیا ہے۔

مسٹر رفسنجانی کے ترجمان رضا سلیمانی نے اے ایف پی خبر رساں ایجنسی کو بتایا کہ مسٹر رفسنجانی ان انتخابات کے ایک امیدوار ہیں اور وہ انتخابات میں شمولیت کی وجوہات بعد میں ایک عوامی اعلان میں ظاہر کریں گے ۔

انہوں نے مزید بتایا کہ مسٹر رفسنجانی صدر کی حیثیت سے ایران کی طاقتور قیادت کے مد مقابل نہیں آنا چاہتے۔

رفسنجانی اعلٰی قیادت سے سیاسی اختلاف نہیں چاہتے

یہی مشکل اصلاح پسند صدر محمد خاتمی کو درپیش رہی جو انتخابات میں بھرپور عوامی حمایت حاصل کرنے کے باوجود ایک بااختیار صدر نہ ہوسکے ۔ جس کے نتیجے میں وہ عوام سے کیے گئے وعدے پورے نہ کرسکے۔

آیت اللہ خامنہ ای نے پیر کو ایک بیان میں کہا تھا کہ وہ پورے ملک کی باگ ڈور کسی ایک سیاسی دھڑے کو دینے کے حق میں نہیں ہیں۔ خیال کیا جارہا ہے کہ یہ ایک ایسا بیان تھا جس سے مسٹر رفسنجانی کو انتخابات میں کھڑے ہونے کا اشارہ ملا۔