حالیہ ہفتوں میں لبنان میں شام حامی ریلیاں بھی ہوئی ہیں

پورے لبنان سے ہزاروں لوگ اس چوراہے پر جمع ہوئے جس کے نزدیک مسٹر حریری ایک کار بم دھماکے میں ہلاک ہوئے تھے۔

مسٹر حریری کے قتل کے بعد شام کی افواج کی موجودگی کے خلاف بیروت کی سڑکوں پر کئی ہفتے سے مظاہروں کا سلسلہ جاری ہے۔

شام نے اپنے کچھ فوجی دستے لبنانی سرحد پر منتقل کر دیے ہیں۔

دمشق نے اقوامِ متحدہ سے وعدہ کیا ہے کہ وہ اپنے 14000 فوجیوں اور خفیہ ایجنٹوں کو مقررہ مدت میں واپس بلا لے گا۔

امریکی وزیر خارجہ کونڈو لیزا رائس نے محتاط انداز میں اس اقدام کا خیر مقدم کیا ہے۔

پیر کو نکالی جانے والی ریلی میں مظاہرین نے لبنان کے لال، سفید اور ہرے قومی رنگوں کے پرچم اٹھا رکھے تھے اور زور زور سے اپنی کاروں کے ہارن بجا رہے تھے۔

مظاہرے کی وجہ سے کئی دفاتر اور اسکول بند رہے۔

مسٹر حریری کے قتل کی تحقیقات جاری ہے حزب اختلاف نے سکیورٹی کے سینئر افسران کے استعفے کا مطالبا کیا ہے۔

نامہ نگاروں کا کہنا ہے کہ ایسے خدشات میں اضافہ ہو رہا ہے کہ یہ مظاہرے کہیں تشدد کی شکل اختیار نہ کر لیں اس لئے حکام آج کی ریلی کے بعد مظاہروں پر پابندی لگانے پر غور کر رہے ہیں۔

حالیہ ہفتوں میں لبنان میں شام کی حمایت میں بھی ریلیاں ہوئی ہیں۔

حزب اختلاف کی ریلی سے ایک ہی روز قبل اتوار کو شام حامی ریلی کا اہتمام کیا گیا تھا۔ شدت پسند گروپ حزب اللہ کی جانب سے کی جانے والی اس ریلی میں شام کی حمایت اور امریکی مداخلت کے خلاف مظاہرہ کیا گیا۔