لبنانی دارالحکومت بیروت میں ہزاروں افراد نے جمع ہو کر ملک میں شام کے کردار کو سراہا اور مغربی ’مداخلت‘ کو مسترد کیا۔ بیروت کے مرکزی چوراہے کی طرف بڑھتے ہوئے ہجوم نے ’بیروت آزاد ہے‘ اور ’امریکہ چلا جائے‘ کے نعرے بلند کیے۔ گزشتہ ماہ شامی فوجوں کے انخلاء کی غرض سے حزب اختلاف کی طرف سے احتجاجی مظاہروں کے آغاز کے بعد سے اب تک شام کے حق میں کیا گیا یہ پہلا بڑا مظاہرہ ہے۔ امریکہ نے شامی انخلاء سے متعلق اقوام متحدہ کی اس قرارداد پر عمل درآمد کا کہا ہے جسے خود امریکہ کی حمایت بھی حاصل ہے۔ اس ریلی کا اہتمام شام نواز شیعہ تنظیم حزب اللہ نے کیا ہے۔ تنظیم کے محافظ سیاہ لباس پہنے چوراہے اور عمارتوں کی چھتوں پر پوزیشن سنبھالے رہے۔ یہ چوراہا شہداء چوک سے چند سو میٹر دور واقع ہے جہاں عیسائی، ڈروز اور سنی مسلمانوں سمیت بہت سے مغرب نواز نوجوان بھی مظاہرے کر رہے تھے۔ فوجی گاڑیوں کی ایک قطار دونوں علاقوں کے درمیان موجود رہی تاکہ مخالف مظاہرین کے درمیان کسی قسم کے چپقلش کے امکان کو روکا جا سکے۔ | 
یہ صفحہ دوست کو ای میل کیجیئے
پرِنٹ کریں
