عمر آفریدی بی بی سی اردو ڈاٹ کام، کابل

دو امیدوار جنہوں نے صدر کرزئی کے حق میں دستبردار ہونے کا اعلان کیا ہے

پہلے عبدالحسیب آریان نے مقابلے سے اپنا نام واپس لیا جس کے بعد سید اسحاق گیلانی بھی حامد کرزئی کے حق میں دستبردار ہوگئے۔

اسحاق گیلانی کے چچا سید احمد گیلانی پہلے ہی حامد کرزئی کی حمایت کر چکے ہیں۔ وہ افغانستان میں قادریہ سلسلے کے روحانی پیشوا ہیں۔

اب تک غیر جانبدار رہنے والے احمد ولی مسعود نے بھی، جو مقتول مجاہد رہنما احمد شاہ مسعود کے بھائی ہیں، صدر کرزئی کی حمایت کا اعلان کیا ہے۔ان کے بھائی احمد ضیاء مسعود کرزئی کی انتخابی ٹیم میں شامل ہیں اور نائب صدارت کے امیدوار ہیں۔

ادھر افغانستان کے سابق شاہ ظاہر شاہ کے داماد سردار محمد ولی صدر کرزئی کی حمایت کا اعلان کرتے ہوئے کہا کہ ظاہر شاہ بھی ان کی حمایت کرتے ہیں۔ تاہم لویا جرگہ سے بابائے ملت کا خطاب ملنے کے بعد وہ کسی امیدوار کو ووٹ نہیں دیں گے۔