احمد ضیاء مسعود کی انتخابی ریلی کو نشانہ بنایا گیا

یہ حملہ افغانستان کی نائب صدارت کے لیے امیدوار اور موجودہ صدر حامد کرزئی کے انتخابی حلیف احمد ضیاء مسعود کی ریلی پر اس وقت کیا گیا جب وہ ایئرپورٹ سے جلسہ گاہ کی طرف جا رہے تھے۔

اطلاعات کے مطابق یہ حملہ ایک بارودی سرنگ کے ذریعے کیا گیا۔

ادھر کابل کے غازی سٹیڈیم میں صدر حامد کرزئی نے ایک انتخابی ریلی سے خطاب کیا۔ انہوں نے لوگوں پر زور دیا کہ وہ کسی دباؤ یا لالچ میں آئے بغیر اپنی رائے دیں اور کہا کہ انہیں عوام کا فیصلہ منظور ہوگا۔

حامد کرزئی سخت پہرے کے باوجود کچھ دیر کے لیے لوگوں کے پاس آئے اور ان سے ہاتھ ملایا۔

جلسے میں کئی ہزار افراد موجود تھے۔

اس موقع پر سیکیورٹی کا سخت انتظام تھا اور تمام انتظامات امریکی فوج کے ہاتھ میں تھے جسے افغان فوج یا ملی اردو کی مدد حاصل تھی۔

جلسہ گاہ میں داخلے سے پہلے صحافیوں سمیت تمام افراد کی جامہ تلاشی لی گئی اور آلات کو چلوا کر دیکھا گیا۔

سٹیڈیم کی دو گیلریاں خواتین کے لیے مختص تھیں جن میں چادر اور برقعہ پوش خواتین بھی موجود تھیں اور ان کی تعداد چار پانچ کے لگ بھگ تھی۔

آج انتخابی مہم کا آخری دن ہے۔

افغانستان میں سنیچر نو اکتوبر کو صدارتی انتخابات ہوں گے۔

حکام کے مطابق ساڑھے دس ملین سے زیادہ افغان عوام نے ان انتخابات کے لیے اپنے ناموں کا اندراج کروایا ہے جن میں اکتالیس فی صد خواتین بھی شامل ہیں۔