عزیزاللہ خان بی بی سی اردو ڈاٹ کام، کوئٹہ

مظاہرین کو منتشر کرنے کے لیے پولیس نے آنسو گیس کا استعمال کیا اور اور فرنٹیئر کور کو طلب کر لیا گیا ہے

سوموار کے روز کوئٹہ میں ہنگاموں کے بعد فرنٹیئر کور کو تعینات کر دیا گیا تھا جس کے بعد حالات بہتر ہو گئے اور ہزارہ ڈیموکریٹک پارٹی کے کارکن اپنے مقتول چیئرمین حسین علی یوسفی کی لاش ان کے گھر لے گئے تھے۔ ان کی نماز جنازہ اور تدفین آج یعنی منگل کو تین بجے مری آباد میں ان کے آبائی قبرستان میں ہو گی۔

ہزارہ ڈیموکریٹک پارٹی نے حسین علی یوسفی کے قتل کے حوالے سے آج یعنی منگل کے روز کے لیے شٹر ڈاؤن ہڑتال کی اپیل کی ہے۔ جماعت کے نائب چیئرمین عبدالخالق ہزارہ نے کہا ہے کہ ان کی جماعت چالیس روز تک سوگ منائے گی جبکہ انہوں نے حکومت سے کہا ہے کہ کوئی بھی حکومتی اہلکار ان کے پاس افسوس کے لیے نہ آئے ۔

پشتونخواہ ملی عوامی پارٹی اور جمعیت علماء اسلام نظریاتی گروپ نے حسین یوسفی کے قتل اور اس کے بعد شہر میں ہنگاموں اور توڑ پھوڑ کی سخت الفاظ میں مذ مت کی ہے۔ پشتونخواہ ملی عوامی پارٹی کے رہنماؤں نے لوگوں سے پر امن رہنے کی اپیل کی ہے۔ جے یو آئی نظریاتی گروپ کے ترجمان عبدالستار چشتی نے کہا ہے کہ ہنگاموں اور توڑ پھوڑ کے واقعات سے بے گناہ تاجروں اور شہریوں کا نقصان ہوتا ہے جبکہ حملہ آور اپنے مقاصد پورے کرکے فرار ہو جاتے ہیں۔