ایوب ترین
بی بی سی اردو ڈاٹ کام، کوئٹہ |  |
| | | کوئٹہ میں نامعلوم افراد کی فائرنگ سے ہلاک ہونے والے پولیس اہلکاروں کے لواحقین احتجاج کر رہے ہیں |
بلوچستان کے دارالحکومت کوئٹہ میں مسلح افراد کی پولیس گاڑی پر فائرنگ میں ڈی ایس پی سمیت چار اہلکار ہلاک ہوگئے ہیں۔ اس واقعہ میں ایک پولیس اہلکار زخمی بھی ہوا ہے۔ ڈی آئی جی کوئٹہ وزیر خان ناصر کے مطابق بدھ کی صبح گورنمنٹ پولی ٹیکنک کالج کے سامنے نامعلوم مسلح افراد نے ڈی ایس پی حسن علی کی گاڑی پر اس وقت فائرنگ کردی جب وہ دیگر اہلکاروں کے ہمراہ سریاب روڈ پر واقع پولیس ٹریننگ سینٹر جارہے تھے۔ فائرنگ کے نتیجے میں تین اہلکار محمد تقی، نصر اللہ اور محمد مہدی موقع پر ہی ہلاک جبکہ ڈی ایس پی سمیت دو اہلکار زخمی ہوگئے۔ زخمیوں کو فوری طور پر بولان میڈیکل کمپلیکس ہسپتال پہنچایا گیا جہاں ڈی ایس پی حسن علی زخموں کی تاب نہ لاتے ہوئے دم توڑ گئے۔ جبکہ دوسرے زخمی صبغت اللہ کو بی ایم سی سے سول ہسپتال منتقل کردیا گیا۔ وزیراعلیٰ بلوچستان نواب اسلم رئیسانی نے واقعہ کا نوٹس لیتے ہوئے کیپٹل سٹی پولیس آفیسر کوئٹہ کو ہدایت کی کہ وہ 48گھنٹوں کے اندر اندر ملزمان کی گرفتاری کو یقینی بنائیں۔ ذرائع کے مطابق واقعہ میں ہلاک ہونے والوں میں ڈی ایس پی اور ایک کانسٹیبل کا تعلق اہل تشیع سے بتایا گیا۔ واقعہ کی ذمہ داری تاحال کسی نے قبول نہیں کی۔ فائرنگ میں جاں بحق ہونے والے اہلکاروں کے ورثاء نے شدید احتجاج کرتے ہوئے بی ایم سی کے سامنے بروری روڈ بلاک کردیا اور ملزمان کی گرفتاری کا مطالبہ کیا۔ یاد رہے کہ محرم الحرام کے دوران کوئٹہ اورسبی میں نامعلوم افراد کی جانب سے اہل تشیع سے تعلق رکھنے والے افراد کو نشانہ بنایا جارہا ہے لیکن اب تک کسی بھی شدت پسند مذہبی تنظیم نے ان واقعات کی ذمہ داری قبول نہیں کی ہے۔ تاہم حکومتی ذرائع کا خیال ہے کہ ممکن ہے ان واقعات میں کالعدم مذہبی تنظیم سپاہ صحابہ یا لشکر جھنگوی ملوث ہو۔ صوبائی حکومت نے پہلے سے ہی ان تنظیموں کے سرکردہ راہنماؤں کی گرفتاری پر لاکھوں روپے کا انعام رکھا ہے۔ کچھ عرصہ پہلے لشکرجھنگوی کے دو اہم راہنماء انسداد دہشت گردی جیل سے فرار ہونے میں کامیاب ہوگئے تھے جس کے بعد شیعہ تنظیموں نے خدشہ ظاہر کیا تھا کہ ان افراد کے جیل سے فرار ہونے کے بعد محرم الحرام کے دوران فرقہ وارانہ دہشت گردی میں اضافہ ہوسکتا ہے۔ | 
جعفر ایکسپریس پر فائرنگ
