رفعت اللہ اورکزئی بی بی سی اردو ڈاٹ کام، پشاور

	فرنٹیر کور کے اہلکار کو چند روز قول اغوا کیا گیا تھا

ہنگو پولیس کے ایک اہلکار محمد غنی نے بی بی سی کو بتایا کہ جمعرات کی صبح ہنگو اور اورکزئی ایجنسی کے سرحدی علاقے شاہو خیل سے فرنٹیر کور کے اہلکار محمد ہلال کی لاش سڑک کے کنارے سے ملی جس کا سر تن سے جدا تھا۔ انہوں نے کہا کہ ایف سی اہلکار کو چھ دن پہلے نامعلوم مسلح افراد نےگاڑی سے اتار کر اغوا کرلیا تھا۔ مرحوم فرنٹیر کور میں نائب صوبیدار تھا۔

ادھر اس واقعہ کے ردعمل میں شاہو خیل ہی کے علاقے میں دو فریقوں نے سڑک پر جانے والے عام لوگوں پر فائرنگ کی جس سے دو افراد ہلاک اور ایک زخمی ہوا۔ ہلاک ہونے والوں میں ایک طالب علم بھی شامل ہے۔

ہنگو کےضلعی ناظم حاجی خان افضل اورکزئی نے بی بی سی سے تصدیق کی کہ فائرنگ سے ہلاک ہونے والوں میں اہل تشیع اور اہلسنت دونوں ہیں۔

انہوں نے کہا کہ مقامی انتظامیہ نے شیعہ اور سنی مشران کے جرگے فوری طور پر طلب کر کے ان سے علاقے میں امن و امان کے حوالے سے بات کی۔

کئی جگہ ٹریفک معطل  ہنگو کوہاٹ اور ٹل پارہ چنار شاہراہیں بھی غیر اعلانیہ طورپر بند ہوگئیں ہیں جس سے دونوں اہم سڑکوں پرگاڑیوں کی آمد و رفت عارضی طور پر معطل ہے عینی شاہدین

انہوں نے کہا کہ ہنگو کوہاٹ اور ٹل پارہ چنار شاہراہیں بھی غیر اعلانیہ طورپر بند ہوگئیں ہیں جس سے دونوں اہم سڑکوں پرگاڑیوں کی آمد و رفت عارضی طورپر معطل ہے۔

ایک سرکاری اہلکار نے بتایا کہ مقامی انتظامیہ نے حالات کو معمول پر لانے کےلیے ملیشیا اور پولیس کے دستے شاہوخیل کی طرف بھیجے ہیں۔

ہنگو میں گزشتہ ایک ہفتہ کے دوران تشدد کا یہ دوسرا واقعہ ہے۔ چند روز قبل بھی ٹل روڈ پر نامعلوم مسلح افراد نے کرم ایجنسی کی ایک گاڑی پر فائرنگ کی تھی جس سے ایک شخص ہلاک جبکہ گاڑی میں موجود تین دیگر افراد کو اغوا کرلیا گیا تھا۔ ہلاک اور اغوا ہونے والوں کا تعلق توری قبیلے سے بتایا جاتا ہے۔

واضح رہے کہ ہنگو میں فرقہ وارانہ نوعیت کے واقعات ایسے وقت ہو رہے ہیں جب محرم الحرام کا مہینہ شروع ہونے میں چند ہی دن رہ گئے ہیں۔ ان واقعات کی وجہ سے علاقے میں شدید کشیدگی پائی جاتی ہے۔