رفعت اللہ اورکزئی، بی بی سی اردو ڈاٹ کام پشاور

	ہنگو ضلع میں اس سے قبل سکیورٹی فورسز کی چیک پوسٹ پر حملہ کیا گیا تھا

ہنگو سے ملنے والی اطلاعات کے مطابق یہ واقعہ پیر کی صبح ہنگو کے علاقے بڑا عباس خیل میں ٹل پشاور روڈ پر پیش آیا۔ ہنگو تھانہ کے ایک پولیس اہلکار نیک نواز نے بی بی سی کو بتایا کہ علی زئی کرم ایجنسی کے چند افراد ایک گاڑی میں پشاور جا رہے تھے کہ ٹل سڑک پر نامعلوم مسلح افراد نےگاڑی پر فائرنگ کردی۔

گزشتہ چند دنوں سے ہنگو اور اس کے ملحق قبائلی علاقے اورکزئی ایجنسی میں قتل اور اغواء کی وارداتوں میں اضافہ دیکھنے میں آیا ہے

گزشتہ چند دنوں سے ہنگو اور اس کے ملحق قبائلی علاقے اورکزئی ایجنسی میں قتل اور اغواء کی وارداتوں میں اضافہ دیکھنے میں آیا ہے۔

دو دن قبل ہنگو کی تحصیل ٹل میں بھی رات کے وقت تقریباً تین سو کے قریب مسلح افراد اچانک ٹل بازار میں داخل ہوئے اور وہاں موجود بیس کے قریب سی ڈیز کی دوکانوں کو آگ لگادی ۔ مقامی لوگوں کا کہنا کہ مسلح افراد نے سی ڈیز اور فلمیں فروخت کرنے والی دوکانوں کے تالے توڑ کر اس میں موجود سامان کو نذرآتش کیا۔

انہوں نے کہا کہ مسلح افراد دو گھنٹے تک بازار میں توڑ پھوڑ کرتے رہے جبکہ اس دوران پولیس تھانہ پر بھی دو راکٹ کے گولے داغے گئے ۔ تاہم بعد میں ٹل فوجی چھاؤنی سے فائرنگ کے بعد مسلح افراد علاقہ چھوڑ کر کسی نامعلوم مقام کی سمت چلے گئے۔

واضح رہے کہ چند ہفتے قبل اورکزئی ایجنسی میں تحریک طالبان کے اہم کمانڈر حکیم اللہ محسود نے پشاور کے صحافیوں سے گفتگو کرتے ہوئے واضح کیا تھا کہ صوبہ سرحد کے مختلف علاقوں میں سی ڈیز سنٹروں پر جاری حملوں سے ان کا کوئی تعلق نہیں ہے۔